“Шын” солуннуң хоочуну Виктор Монгушевич Конгарның база бо хүннерде юбилейи. Ынчангаш хүндүлүг хоочунувус, 70 харлаан юбилейиңер таварыштыр каң дег кадыкшылды, өг-бүлеңерге амыр-чыргалды, хей-аъдыңар, сүлдеңер бедик, тура-сорууңар быжыг болурун йөрээдивис!
Виктор Монгушевич 1955 чылдың апрель 15-те Улуг-Хем кожууннуң Шанчы суурга, ажылчын өг-бүлеге төрүттүнген. Ол школаны дооскаш, чолаачы мергежил өөренип алгаш-ла, машина башкарып, күш-ажылчы оруун эгелээн. Ада-чурттуң камгалакчызы болганда, шериг албанын база үезинде эрттирген.
Тываның хоочун солуннарының бирээзи “Шынга” ол 1993–94 чылдарда ажылдап киргеш, барык 10 ажыг чыл ажылдааш, хүндүлүг дыштанылгаже үнген.
Солунга ажылдап турар үелеринде кол редакторлар Артур Ойняр-оолович Хертек, Светлана Сюр-ооловна Монгуш база солуннуң хөй санныг ажылдакчылары-биле эгин кожа ажылдап, солун орукту эрткен. Кады ажылдап турган эштери, коллегалары, Виктор Монгушевичини чугаакыр, хөглүг, оюн-баштак боорга, хүндүлээр, сургакчылаашкыннар болгаш ажылчын үнүүшкүннерде чолаачызы ол боорга, аажок өөрүүрлер.
“Ачам хөгжүмге аажок ынак, ырлаар кижи. Үе-үе болгаш, кады ажылдап чораан эштерин сактып, кайы хире солун үелер турганын болганчок чугаалаар” — деп, уруу Валерия Викторовна ачазының дугайында чугаалады.
Виктор Монгушевич бүгү назынында машина мунуп, республиканың шупту булуңнарын кезип, ажылының аайы-биле коллегаларын аргыштырып турган. Ам бо хүнде ол хүндүлүг дыштанылгада, малын малдап, ажы-төлүнге дузалажып чоруур. Мал малдаардан аңгыда, шевери база аажок, чазаныр, тудар дээш, черле кылбазы чок.
Виктор Монгушевич чүгле хүндүткелдиг чолаачы эвес, ол өөнүң ишти Елизавета Чимбиевнаның быжыг чөленгиижи, 3 ажы-төлүнүң ынак ачазы, 4 уйнуунуң кырган-ачазы база 1 уйнуунуң уруунуң улуг өгбези.
Улуг уруу Валерия Викторовна база ачазының аайы-биле массалыг информация чепсектериниң төлээзи, хөй чылдарда “Шын” солунга ажылдап, корректордан корреспондентиге чедир депшээн. Ортун оглу Валентин Викторович Москва хоорайда ажылдап, чурттап турар. Хеймер уруу Лариса Викторовна база дээди эртем-билиглиг, чедиишкинниг ажылдап чоруур.
Өг-бүлениң чедиишкини дээрге-ле, ада-иезиниң кижизидилгези болур. Виктор Монгушевич биле Елизавета Чимбиевна кады 50 чыл чурттап, эки-бакты үлежип, ажы-төлүнге чоргаарланып чоруурлар.
“Шын” солуннуң хоочуну болганымга, чоргаарланыр мен” – деп, Виктор Монгушевич хоочун эштеринге ужурашкаш, үргүлчү чугаалаар чаңчылдыг.
Бистиң корр.
Чуруктарны В.Конгарның өг-бүле архивтен алган.
"Шын" №13 2025 чылдың апрель 10
