Солун номчуп олурар улуг назылыг кижилерни көөрге безин көрүштүг. Үргүлчү «Шын» солунну чагыдып номчуп чоруур кожаларым бар. Ол дээрге Ноозун Чалзырай, Биче-оол Ынаалай дээш өске-даа кырганнар бар. Олар 70 хар ажып турар үлегерлиг хоочуннар.
«Шын» солунну номчуурга, дыка солун, кижи дыка хөйнү билип алыр. Ылаңгыя ССРЭ үезинде чурттап чораан солун төөгүлүг кижилерни бижип турар. Чоокта чаа Эрзин чурттуг, улуг назылыг Сайзов Дирчинниң дугайында үнген чүүлдү улуг сонуургал-биле номчудум.
«Шын» солун 1925 чылдан чырыкче үнүп эгелээнин ачам чугаалап чораан. Удавас чүс чылын демдеглээр өгбе солунувус-биле шыыладыр базып ор бис. Бижикчилер, номчукчулар, солунувусту кагбаалыңар! Ам-даа эки чагыдып, номчуулуңар.
Мен бичиимде-ле «Шын» солунга чүүлдерни бижип эгелээн мен. Ам бодум безин кырый бердим. Ынчалза-даа ам-даа бижиксей бээр мен. «Шын» чокта чалгаарай бээр мен.
Чечекмаа САДИ, ТР-ниң алдарлыг ажылдакчызы.
Эрзин кожуун, Мөрен суур.
“Шын” №49 2024 чылдың июль 3
«Шынывыс» дээш туржуулуңар!
5 июля 2024
19