ТР-ниң Көдээ ажыл-агый болгаш аъш-чем яамызы 600 муң рубль шаңнал фондулуг сиген белеткээриниң сумулар аразында мөөрейи сентябрь 6-да доостурун сагындырган.
Мөөрейге киржирде:
1) Хол-биле кезер сигенчилер бригадазы көдээ суму чагыргазынче чагыгны киирер, бригаданың санында база кежигүннер составында кызыгаарлаашкын чок;
2) Көдээ суму чагыргазы чагыгларның шупту реестрин тургускаш, муниципалдыг тургузугнуң көдээ ажыл-агый эргелелинче ниити медээни чорудар;
3) Көдээ ажыл-агый эргелели шупту чагыгларны хынаар кожуун комиссиязын тургускаш, эң-не хөй сиген белеткээн сиген кезикчилериниң бригадаларын илередип, шылгараңгайларын тодарадыр;
4) кожуун комиссиязының түңнелдерин өөренип көөр кылдыр Тыва Республиканың Көдээ ажыл-агый болгаш аъш-чем яамызынче чорудар.
Белеткеттинген мал чеминиң хемчээлин хүлээп, санаарда, чүгле хол-биле кескен болгаш чедирер черинче сөөрткен хөпээннер саны-биле тодарадыр. Көдээ ажыл-агый техникалары – механизастаттынган кадыырлар, ворошилка-дырбааштар, тырый бастырар херекселдер ажыглаанын санавас.
Комиссия муниципалдыг тургузугларның айыткан тиилекчилериниң шупту чагыгларын өөренип көргеш, белеткеттинген мал чеминиң хемчээлин санап, медээни хынаары-биле шыгжаар черинде чедирген сиген хөпээниниң хемчээлин санаар үнүүшкүннерни организастаар.
Шилилде түңнели-биле тиилекчи бригада 300 муң рубльди, ийиги чер дээш 200 муң рубльди, үшкү чер дээш 100 муң рубльди шаңнал кылдыр алыр.
Айтырыглар бар болза, бо дугаарже долгааш, харыыларны ап болур: 9-75-33.
ТР-ниң Көдээ ажыл-агый болгаш аъш-чем яамызының медээзи.
“Шын” №65 2024 чылдың август 28
