Силер-биле тыным тудуш

Хертек Шириин-оол (1946 – 2004 чч.) – Россияның алдарлыг, Тываның улустуң артизи, Тыва Республиканың Күрүне шаңналының эдилекчизи.
Х.О. Шириин-оолдуң “Силер-биле тыным тудуш” деп 2011 чылда үнген номундан.

ЭЖЕШ ОДУРУГЛАР

Эктинейде бажың чорда,
Эр-ле сорууң салбайн чору!
***
Эки аъдың мунуп чорааш,
Эзир түрүң тырттынып чор!
***
Эзим-аргаа оруун часпас
Эргим аъдың хүндүлеп чор.
Эзер-чонак черге салба,
Экер эрниң эди-дир ол.
***
Аржаан-биле суггаргаштың,
Аъдың бажын суйбап чору.
Аът бажы черге чытса,
Артка-сынга азып чору.
***
Эки аът — ээзин каастаар,
Эрес эрлер — чуртун каастаар.
***
Мерген угаан — бодунга эки,
Бе хымызы — кадыкка эки.
***
Кулунчакты эзертеп өөредир,
Кула бени саап өөредир.
***
Аът каазы — аалчыга хүндү,
Аът эъди — аарыгга эм боор.
***
Хоюган дээш аъдың кончува,
Кортук дээш оглуң эттеве.
***
Ыяткаштың ыдың какпа,
Ыңгыржакты эзер кылба.
***
Соңгулдалар көвүдээрге — даргалар немежир,
Соок хат хадыырга — мал чудаар.
***
Автобуска олургаш, акшаң хавын утпа,
Ажылдап чоруткаш — чанарын утпа.
***
Каарган эвес, каргаттынып чорба,
Хаван эвес, кастынып чорба.
***
Дерзииленип чорааш, тенек аарый бердиң,
Демирге кастаткаш адырылбайн бардың.
***
Дашка дүвү чылгааш, чазый атка кирдиң,
Даргаларга сөгүрээш, чашпаа атка кирдиң.
***
Оор эътте хан хөй боор,
Оңган чечекте чыт чок боор.
***
Улуг улусту дыңнап өөрен,
Ужа эъдин кезип өөрен.
***
Холу шимчээрге, хырын тодар,
Хоозун чугаага хүн бадар.
***
Куруг тавак даашкыр,
Курттуг өшкү алгыжы.

«Шын» №42 2024 чылдың июнь 8