Өскүс-оол дугайында тоолга үндезилээн мюзиклге либретто бижииринге К.С. Шойгу аттыг Культура фондузунуң грантызынче мөөрейни эрткен чылын чарлаан. Январь 10-да ТР-ниң Культура яамызынга ук мөөрейниң баш бурунгаар I-ги чадазын түңнээн хурал болган.
Аңаа чарлаттынган мөөрейниң комиссиязы чыглып хуралдаан. Чыылганнарга ТР-ниң культура сайыды Виктор Чигжит байыр чедирип, мөөрейниң түңнели-биле тиилекчини илереткен соонда, тыва культураның төөгүзүнде база бир онзагай мюзиклди В. Көк-оол аттыг Национал театрның сценазынга тургузары манаттынып турарын дыңнаткан. К.С. Шойгу аттыг Культура фондузунуң Тывада салбырының күүсекчи директору Аяс Лопсан сөс алгаш, мөөрейниң эксперт комиссиязының даргазы Ирина Күжүгетовна Шойгунуң мурнундан байыр чедиргеш, комиссия кежигүннеринге үре-түңнелдиг ажылдаарын күзээн.
Болган хуралга эксперт комиссиязынче кирген 16 кежигүннүң 9-у киришкен. Оларның аразында Сибирьниң Д. Хворостовский аттыг күрүнениң уран чүүл институдунуң профессору, оркестрлерниң үрер болгаш соктаар хөгжүм кафедразының эргелекчизи Петр Казимир, ол-ла институттуң профессору, искусствовед Людмила Гаврилова, Красноярск крайның Композиторлар эвилелиниң даргазы, музыковед Владимир Пономарев болгаш Тываның чогаалчылары киришкен. Хуралга кээп шыдаваан комиссия кежигүннери баш бурунгаар мөөрей киржикчилериниң ажылдары-биле танышкаш, боттарының үнелелдерин берген саавырны чорудуп берген.
Чарлаттынган мөөрейге 7 автор ажылдарын киириштирген. Грант бээриниң негелдезин ёзугаар комиссия кежигүннери киржикчилерниң ажылдарын шыңгыы сайгарып көрген. Чижээ, либреттонуң сөзүглели ооң мурнунда каяа-даа ажыглаттынмаан, кайда-даа бижиттинмээн турарынче, ооң кол сюжединче тыва улустуң тоолдарындан материалдарны киириштирип тура, албан Өскүс-оолдуң киржилгезин кииргенинче кичээнгейни угландырган. Ол ышкаш либретону шүлүглел кылдыр орус, тыва ийи дылдарга бижээн турары, аңаа тыва национал культураның онзагайын көргүзери, тыва улустуң аас чогаалын, амыдырал-чуртталгазын болгаш үзел бодалын, өртемчейже көрүүшкүнүн илередири – бо бүгү мөөрейниң негелделеринче кирген.
Баш бурунгаар түңнелдер кылган хурал соонда, эксперт комиссиязы грантыже мөөрейниң I чадазының албан- ёзу медээзин 2024 чылдың январь 15-те чарлаар. Январь 10-дан тура мөөрейниң ийиги чадазы– либреттога хөгжүм аялгазын чогаадыры болгаш мюзиклдиң костюмнарының эскизтерин (дөзевилелдерин) тургузарынга мөөрей киржикчилеринден билдириишкиннерни хүлээп эгелээн.
Карина МОНГУШ.
Буян Ооржактың тырттырган чуруу.
"Шын" №2 2024 чылдың январь 13
