Социал керээ күрүне деткимчезин алгаш, хууда ажыл-агыйын ажыдып, бодун боду ажылга хаара тудуп турар хамаатыларывыс хүнден хүнче өзүп орар. Эрткен 2022 чылда 4073 хамааты ук программаның деткимчезин алган дээрзин ооң мурнунда үндүрүлгелерден-не эскерген боор силер.
2023 чылдың эң-не баштайгы киржикчилери мөөрейниң муниципалдыг болгаш республика чергелиг чадаларын эртип алган. Ниитизи-биле 55 киржикчиниң 4-ү документилериниң четче эвес азы бизнес-планы чедир санаттынмаан дээн ышкаш аңгы-аңгы чылдагааннарның уржуу-биле республика чергелиг чадазын эртпейн барган. Ынчалза-даа документилерин чедир кылдырып, чыып белеткенип алгаш, катап киржир арга бар дээрзи билдингир.
Эрте берген 51 хамаатының аразында ресторан, кафе, чараштаныр өргээ, ателье, дизайн болгаш фото-чурукчунуң кабинеттери, ыяштан чазаныр мастерская, немелде өөредилге төвү, автомашиналар септээр чер, бичии уругларга ойнаар төп, металлдан кылыглар мастерскаязы, фитнес-төп, бижимел болгаш аас-биле очулга кылыр чер, цемент, бетон болгаш даштардан кылыглар мастерскаязы дээш, кандыг-даа хевирниң ажыл-агыйы бар.
Удавас 51 хамааты хууда ажыл-агыйын сайзырадып, бут кырынга туруп, амыдыралы чегей азы ажыл чок хамааты деп категориядан үнер. А үндүрүг албан черинче «Далайга дамды дуза» дээри дег, каш-даа болза акша «дамдылап» кирип эгелээр. Тывавыстың бурунгаар сайзырап орарының база бир демдээ-дир.
/ Бистиң корр.
