Соңгулдалар соонда В. Путинниң медеглелдериниң кол-колу:
— Соңгулдаларга чоннуң хөйү-биле келгениниң ужуру – чуртта ниити нарын байдал тургустунганы база Россияның бодунуң келир үеде хөгжүүр эргезин чепсектиг камгалаар ужурга таваржып турары. Чуртка херек мен деп чүүлдү бөдүүн хамааты бүрүзү медереп билген;
— Соңгулда комиссияларының ажылының шынарынга хомудалдар эвээш болган;
— Амгы үеде РФ-тиң Чазаа-даа, Төп банк болгаш РФ-тиң Президентизиниң администрациязы үре-түңнелдиг ажылдап турарын көргүскен;
— Бодап алган планнар хөлчок улуг. Оларның дугайында чоокта чаа Федералдыг Хуралга Айыткалда демдеглээн мен. Ол шиитпирлер, сорулгалар, чугаажок-ла, боттаныр;
— Тускай шериг операциязының сорулгаларын күүседири, чурттуң камгалалын быжыглаар, Чепсектиг Күштерни улам быжыглаары – чаа хуусаада чугула сорулгаларның бирээзи;
— Украинага “санитар девискээрин” тургузар ужурга таваржыры чадавас деп Президент чугаалаан. Ындыг айыыл чок чорук хандырар девискээрлерни, даштыкы чепсек-даа ажыглап тургаш, эртери белен эвес болур.
Соңгулдаларның түңнелдери Донбасс биле Новороссияның Россияга камгалал дээш өөрүп четтирип турарын көргүскен. Шак бо регионнарның улаштыр камгалал биле деткимчеге ынаныжы чогуп-бүдер кылдыр Россия бүгү чүүлдерни кылыр;
— Бо хүннерде РФ-тиң кызыгаар чоогунда регионнарынче халдаашкыннар уламчылап турар, ынчалза-даа РФ-тиң девискээринче бичии када киргеш безин, дайзынның чидирии 100 хуу болуп турар;
— Олимпийжи оюннар үезинде от ажыдыышкынын соксадырының дугайында Макроннуң саналының дугайында Путинниң бодалы: ооң дугайында билбес мен, ынчалза-даа Россияның эрге-ажыынга кандыг-даа айтырыгларны өөренип көөрүнге белен бис;
— Украинада натожуларның барының, ында оларның хөйү-биле өлүп турар дугайында Россия билир. РФ биле НАТО-нуң аразында чөрүлдээ үшкү делегей дайынынга чедир чаңгыс базым болур.
Интернеттен А. ХЕРТЕК белеткээн.
"Шын" №21 2024 чылдың март 20