Тывада «Ада-чурт камгалакчылары» фондунуң регионалдыг салбыры бодунуң ажылын июнь 1-де эгелээн. Тускай шериг операциязының хоочуннарын, мөчээн болгаш балыгланган дайынчыларның өг-бүлелерин персоналдыг үдээри фондунуң кол сорулгазы. Социал координаторлар баштайгы алды ажыл хүнүнде келген чүс ажыг кижиниң 90 хире билдириишкинин ажылдап кылган дээрзин, салбыр дыңнаткан.
Салбырда тускай өөредилге эрткен социал координаторлардан аңгыда, МФЦ-ниң, Чонну ажылга хаара тудар төптүң, эмчи-социал экспертизазының база Кадык камгалал яамызының специалистери ажылдап турар. Ол ышкаш, Кызылда бактааттынган 55-ки даг мотоадыгжы бригаданың хууда составы-биле ажылдаар ажылдакчылары салбырның баазазынга хамаатыларны неделя санында хүлээп алыр кылдыр бригаданың командылал чери-биле чугаалажып турар.
Келген кижилер колдуунда тускай төлевирлерге, дайынчы хөделиишкиннер хоочуну эрге-байдалды тыпсырынга документилерин киирип, ис чок читкен дайынчыларны дилээринге дуза дилеп кээп турар. Балыгланган дайынчыларны эмнелгеге чыттырарынга база реабилитация эрттиреринге, уруглар садынга ажы-төлүн тургузарынга, уруглар лагерьлеринче путевка алырынга деткимче көргүзерин дилээн дилеглер хөй.
Фондунуң регионалдыг салбырының специалистери дараазында адресте хүлээп турарын сагындыраал: Кызыл хоорай, Кызыл партизаннар кудумчузу, б. 30, понедельниктен пятницага чедир, 9.00 - 18.00 шактарда.
«Ада-чурт камгалакчылары» фондунуң Тывада салбыры шупту социал четкилерде бар: в ВКонтакте — https://vk.com/fondsvotuva, Одноклассниктерде — https://ok.ru/group/70000002766870, Telegram-да — https://t.me/fondsvotuva