Республиканың «Деткимче» төвүнүң специалистери Чаа чылдың дыштаныр хонуктарында «Социал десант» акциязынга каттыжып, берге байдалга таварышкан улуска дузазын көргүзер сорулгалыг рейдилерни чорудуп эгелээн. Чыккылама сооктарда чурттаар чери чок азы амыдыралында берге байдалга таварышкан кижилерни изиг чем-биле чемгерип (мүн, каша, шай), чылыг идик-хеп-биле дузалап, доңуп-дожаан болза, чылдынып алыр арганы берип турарлар.
Январь 1-де Буян Кара-оолович, Март-оол Хүлер-оолович база Джемма Эрес-ооловна олар доңуп-дожаан үш кижини аъшкарып-чемгерип, дузазын көргүскеннер.
Акция январь 11-ге чедир уламчылаар. Кудумчуга доңуп-дожаан азы аштап-суксаан кижи көрзүңерзе «Деткимчениң» тускай автомашиназынче чорудуптарын Төптүң специалистери дилеп турар.
Тускай автомашинаның турар чери: Кызыл хоорай, Тыва эки турачылар кудумчузу, «Алма» садыг төвүнүң солагай талазы. Ажылдаар шагы: 13:00 шактан тура.
Харылзажыр телефону: 5-10-25.
Республиканың «Деткимче» төвүнүң медээзинден.
