Чылдың-на республиканың социал албан черлериниң материал-техниктиг байдалын экижидип, социал ачы-дуза алыкчыларының айыыл чок чоруун хандырары-биле планныг ажылдарны чорудуп турар. Бо чылын Ак-Довурак хоорайда болгаш Тес-Хем кожуунда Өг-бүле болгаш уругларга социал дуза төптеринде капитал септелгени эгелеп, Кызылда назылап кырааннарның болгаш инвалидтерниң интернат бажыңының канализация системазын чаартып турар. Республиканың Күш-ажыл болгаш социал политика яамызы ол ажылды удуртулгада алган.
Тес-Хем кожууннуң Өг-бүлеге болгаш уругларга социал дуза төвүнде бо чылдың апрель 1-де эгелээн септелге ажылдары август 1-де доостур ужурлуг. Аштанып чунар черлерни чаартып, электри удазыннарын солуп, ханаларын болгаш дээвиирин септээн.
«Бо өскерлиишкиннер бистиң төптен ачы-дуза ап турар уругларга болгаш өг-бүлелерге таарымчалыг болгаш айыыл чок байдалдарны хандырар. Амгы үениң инфраструктуразы бистиң албан черивисте ачы-дуза чедирилгезин экижидер» – деп, төптүң директору Ай-Кыс Оюн чугаалаан.
Ак-Довурак хоорайның Өг-бүлеге болгаш уругларга социал дуза төвүнде шаланы солуп, өрээлдээш, ханаларның, дээвиирниң шеверлел ажылдарын кылыр. Оон аңгыда, электри удазыннарын, одалга системазын, суг хоорзаларын база канализацияны, өрт медээчизин септээн.
Кызылдың хоочуннарның болгаш инвалидтерниң бажың-интернадының канализация системазын бүрүнү-биле солуур. Амгы үеде аштап-арыгланыр черлерниң хоорзаларын солуур ажылдарны кылып турар.
Республиканың Күш-ажыл яамызы Хайыраканның бажың-интернадының чырык удазыннарын солуур электромонтаж ажылдарынга садыглажылганы белеткеп турар.
Үстүнде айыттынган албан черлериниң капитал септелгелеринче республика бюджединде 15 сая рубльди аңгылаанын ведомство дыңнаткан.
А. МОНГУШ.
Чурукту ТР-ниң Чазааның парлалга албанындан алган.
“Шын” №20 2025 чылдың май 29
