Чоокта чаа Кызылдың 17 дугаар ортумак школазынга российжи чадаг-тергежи Юрий Валентинович Кочуров-биле солун ужуражылга болган.
70 хар ашкан чадаг-тергежи бодунуң хар-назынынга дүүшпес: аныяксыг, кончуг эрес, чугаакыр, баштак кижи болду. Ол 15 чыл ажыг үе иштинде чадаг-терге мунуп алгаш, оранны одуртур, делегейни дескиндир аян-чорук кылып чораан.
Ол бир херээжен кижи-биле таныжып алгаш, Тверьден Архангельскиге чедир тергелиг четкенин, ол-ла хевээр терге ооң ынак спортчу аян-чоруу болуп артканын баштактанып чугаалады. Дараазында чылын Сочиден Севастопольга чедир чорааш, терге мунарынга ооң мергежили бедип, Израиль, Вьетнамче болгаш ССРЭ-ниң янзы-бүрү хоорайларынга четкен. 2018 чылда Москвадан Венецияга чедип, ооң соонда Сербияга чедир 200 километрни бүдүн хүн-дүн иштинде эрткеш, рекордту тургускан болуп турар.
Чедип алган чедиишкиннеринге тура дүшпейн, ам-даа чадаг-тергелиг аян-чорук кокпазын уламчылаар сорулгалыын чугаалап турар. “Чогум кандыг мергежилдиг, каяа ажылдап чораан силер?” – деп, мээң айтырыымга Свердловск облазынга төөгү эртемин башкылап, уран чүүлге бодунуң онзагай талантылыы-биле Уралга баян башкылап, хөгжүм херекселдериниң оркестрин удуртуп чораанын харыылады.
Юрий Валентинович бодунуң аян-чоруунуң дугайында делгереңгейи-биле чыылганнарга тайылбырлап, гармошказын туткаш, ойнап, ырлай бээрге, черле ыр-шоорга, хөгжүмге болгаш спортка салым-чаяан чедер кижи-дир деп бодал башка кирди. Бүдүн зал-биле сураглыг ыры “Катюшаны” бадырыптарга, көрүкчүлерниң хей-аъды көдүрлүп, оларның үзүктел чок адыш часкаашкыны ооң талантызынга улуг шаңнал, мөгейиг болганын чугаалаар апаар.
Аалчыны школаның коллективи чылыы-биле аяк шайлыг уткуп, өөрүп четтириишкинниң чылыг сөстерин чугаалааннар.
Аян-чорукчунуң кокпазы менди-чаагай уламчылап, оран-чуртун эргип, улус-чонун магададып-ла чорзун деп йөрээл-биле доостум.
Раиса ОНДАР, башкы, чогаалчы, журналист, РФ-тиң Улус өөредилгезиниң тергиини, ТР-ниң өөредилгезиниң алдарлыг ажылдакчызы.
«Шын» №89 2023 чылдың ноябрь 22
