Моолга Чингис-Хаан үезинде хөөлбекче сидиктээн кижини шаажылап өлүрер турган, чүге дизе хову черге суг алдындан үнелиг болгай.
1665–1666 чылдарда Англияга чума аарыы бүдүн суурларны чок кылып турган. Ылап-ла ол үеде өлүмнүг халдавырны чок кылыры-биле таакпылаарын медицина ажыктыг деп санаан. Таакпыдан ойталаан уругларны болгаш элээдилерни кезедип турган.
Ортаакы вектер үезинде далайжылар кадык-даа дижин туруп тургаш, албан-биле алдын диш салдырып алыр турган. Чүге дээр болза, кажан-бир шагда өске черге өлүр апарза, бажыңындан ырак черге төлептиг ажаап каар кылдыр.
Францияда быштактың каш хевирин бүдүрүп турарыл? Сураглыг быштак кылыкчызы Андре Симон “Быштак ажыл-херээниң дугайында” деп номунда 839 сорт барын демдеглээн. Оларның аразындан эң-не сураглыы камамбер биле рокфор. Камамберни өреме немээн сүт-биле кылыр. 4–5 хонган бышкан быштактың картынга дүдүк тыптып кээр, ол тускай мөөгү культуразын илередип турар.
Даараныр машина чогааткан сураглыг Исаак Зингер чаңгыс өйде 5 херээженге кадайланып алган. Ол кадайларындан 15 ажы-төлдүг. Кыс уругларын шуптузун Мэри деп адаан.
Чурукту интернеттен алган.
«Шын» №16 2025 чылдың май 1