Национал төлевилелдер талазы-биле комитеттиң ээлчеглиг хуралы болуп эрткен. Ону Тыва Республиканың Чазааның Даргазының оралакчызы Орлан Сарыглар башкарып эрттирген. Комитеттиң бо удаада хуралынга кадык камгалал талазы-биле национал төлевилелдерни республикада канчаар боттандырып турарының дугайында чугаалашкан.
“Узун болгаш идепкейлиг чуртталга” национал төлевилелди, “Мээң эмчим”, “Кадык чуртталгаже орук” болгаш “Ажы-төлдүң кадык болурунче орук” губернатор төлевилелдерин боттандырып турарын кадык камгалал албан черлериниң удуртукчулары болгаш национал төлевилелдерге ажыл-чорудулгазы хамаарылгалыг харыысалгалыг ажылдакчыларның киржилгези-биле сайгарып көрген.
Кадык камгалалының национал төлевилелдерин боттандырар ажылда чедиишкиннер болгаш четпестер-даа бар дээрзин хуралга дыңнадыг кылган эштер демдеглээннер. Төлевилелдерниң сорулгаларын чедип алганының чамдык чижектери мындыг: чүрек-дамыр аарыглары-биле демисел чедиишкинниг, ооң 6 сорулгазының 5-и күүсеттинген: чигир аарыы талазы-биле сорулгалар 100 хуу чедип алдынган. Салдынган сорулгалар чедип алдынмаан таварылгалар база бар, чижээ, “Кадыкшылды – кижи бүрүзүнге” регион төлевилелиниң 3 сорулгазы үжелээ күүсеттинмээн.
Национал төлевилелдерниң чамдык сорулгаларының талазы-биле көргүзүглер шоолуг эвес-даа болза, ниитизи-биле кадык камгалал национал төлевилелдерни боттандырарында чедиишкиннер бар. Кадык камгалалының баштайгы звенозу фельдшер-акушер пунктулары сөөлгү чылдарда элээн хөй туттунган, эң ылаңгыя көдээже ажылдап үнген эмчилерниң саны көвүдээн. ФАП-тарны эки шынарлыг тударынга контрольду школаларны тудуп турарының хыналдазы дег кылдыр тургузар, аңаа хөй-ниитиниң, янзы-бүрү хыналда органнарын хаара тударын хуралдың киржикчилери саналдааннар.
Аарыг кижилерни эмнээринден аңгыда олар боттары кадык-чаагай чуртталгага сундулуг болур байдалды тургузарынче улуг кичээнгейни салырын национал төлевилелдер талазы-биле комитеттиң ээлчеглиг хуралының киржикчилери сагындырганнар.
Амыдыралдың кадык-чаагай хевирин суртаалдаан социал рекламаны, чуртталганың кадык овур-хевири-биле чурттап, ажылдап чоруур кижилерниң үлегер-чижээн көргүскен видеороликтерни кадык камгалал шугуму-биле көвүдедир белеткеп, социал четкилерге хөй көргүзүп, кадык-чаагай чуртталга чоннуң брендизи апаарын чедип алыр байдалды тургузары чугула деп, Кадыкшылга төвүнүң ажылдакчылары чугаалап, “Кадык амыдырал биле уран чүүлдүң аяннажылгазы”, “Аарыгны хөөмей-биле эмнээри” дээш чамдык төлевилелдерни “Идегел” коммерциялыг эвес организация-биле боттандырып турарын дыңнатканнар.
“Мээң эмчим” губернатор төлевилели эмчиниң чонга хүндүткелдиг ат-алдарын көдүреринче угланган. Бо төлевилелди боттандырарынга 72 сая рубль акшаны тускайлап үндүрген. Эң эки эмчилерге Тываның Баштыңының “Буянныг чүрек” күрүне шаңналынга 6 сая рубль акшаны тускайлаан.
Кадык камгалал талазы-биле национал болгаш губернатор төлевилелдериниң сорулгаларын күүседир ажылды улам күштелдирериниң чугулазын хуралдың киржикчилери демдеглээннер.
Ш. ЛОПСАН.
Ада ТЮЛЮШТУҢ тырттырган чуруктары.
“Шын” №24 2025 чылдың июнь 26