“Сорунза” губернатор төлевилели-биле 2023 чылда 3 көдээ культура бажыңы туттунган. Ону боттандырарынга 43,5 сая рубль, ооң иштинде республика бюджединден 39,0 сая рубльди, тус черниң бюджединден 4,5 сая рубльди аңгылаан (бир Культура бажыңынче-ле 14 сая 500 муң рубльди, ооң иштинде 13 сая рубльди республика бюджединден, 1 сая 500 муң рубльди муниципалдыг бюджеттен аңгылаан).
Республика бюджединден 13 сая рубльди тудуг бүрүзүнүң чарыгдалдарынче:
7 сая 500 муң рубльга ТР-ниң Культура яамызы тудуг материалдарын саткаш, муниципалитетке хүлээткен;
1 сая 500 муң рубльга ТР-ниң Культура яамызы дериг-херекселдерни болгаш эт-септи саткаш, дамчыдып берген;
4 сая рубльди республика бюджединден дугуржулга ёзугаар муниципалдыг тургузугларның бюджединге берген.
Ол акшаның: 1 сая 380 муң рубльди кудук казарынга, өртке удур медээ дамчыдыкчызын тургузарынга болгаш видеохайгаарал чорудар дериг-херекселди салырынче, манза материалдар садып алырынче чараан; 1 сая 720 муң рубльди – тудуг бригадаларының шалыңынче; 900 муң рубльди тудуг материалдарын сөөртүп чедирериниң хөлезининче чараан.
Муниципалдыг бюджеттен 1 сая 500 муң рубльди тудуг бүрүзүнүң девискээрин дескилээринче, электри хандырылгазынче, кывар-чаар материалче, хөгжүм дериг-херекселдери садып алырынче көрдүнген.
Ынчалдыр 2023 чылда үш көдээ культура бажыңы туттунган: Сүт-Хөлдүң Кара-Чыраа суурга 2023 чылдың ноябрь 3-те ККБ-ниң байырлыг ажыдыышкыны болган; Өвүрнүң Ак-Чыраа суурга 2023 чылдың ноябрь 1-де ККБ-ниң байырлыг байдалга ажыткан; Тес-Хемниң Ак-Эрик суурунга 2023 чылдың декабрь 27-де ККБ-ниң байырлыг ажыдыышкыны болган.
“Сорунза” губернатор төлевилели-биле туттунган ККБ бүрүзүнүң шөлү дөмей — 243 дөрбелчин метр, көрүкчү залында 120 олуттуг.
Тес-Хем кожуун чагыргазы Ак-Эриктиң Культура бажыңының тудуунга бичии өскерилгени, ном саңынга немелде өрээлди киирген.
Бистиң корр.
«Шын» №100 2023 чылдың декабрь 30
