Космосту ёзулуг хуулгаазын чүүл деп болур. Космос, ракеталар болгаш планеталар дугайында кижилер, ылаңгыя бичии уруглар, дыка сонуургаар. Ол дугайында ажы-төлге бөдүүнү-биле тайылбырлап берип болур.
ЮРИЙ ГАГАРИН — БИРГИ КОСМОНАВТ
1961 чылдың апрель 12-де делегейде бир дугаар космосче ужудуп үнген кижи — Юрий Гагарин. Ол дээрже «Восток» деп ракетага ужудуп үнгеш, бистиң планетавыстың кайы хире чаражын көрген: Черниң кырында «дыдыраш» булуттар, челээш, дүндүүнде кара-көк дээр. Ужудуушкун 108 минута үргүлчүлээн.
Гагарин ракетага көңгүс чааскаан турган-даа болза, ол ужудуушкунну совет эртемден Сергей Королёвтуң удуртулгазы-биле бүдүн команда белеткээн. Ол бүгү ужудуушкун үезинде Гагарин-биле радиохарылзаа таварыштыр чугаалажып турган.
Гагарин Черже бадарда, капсула иштинге, оон катапультулааш, парашют-биле баткаш, Волгадан ырак эвеске менди-чаагай дүшкен. Космонавтыны бир-ле дугаар картошка тарып турган кырган-авай уйнуу-биле көрүп кааннар. «Мен орус, совет космонавт-тыр мен! Космостан ужуп келдим!» — деп, Ю. Гагарин оларга чугаалаан.
Ынчалдыр Юрий Алексеевич Гагарин делегейде эң-не сураглыг кижи апарган. А Россия биле Совет Эвилели космосче бир дугаар кижи үндүргенинге улуг чоргаарланыр.
БЕЛКА БИЛЕ СТРЕЛКА
А чогум-на космосче бир-ле дугаарында кижилер эвес, а дириг амытаннар ужуп үнген. 1960 чылда Совет Эвилели чавыс Черден чоок орбитаже Белка биле Стрелка деп 2 ытты, 40 күскени база 2 крысаны ужудуп үндүрген. Олар дедир кадык чаагай ээп келгеннер. Ынчан эртемденнер космоска организм кандыг шылгалданы эртип шыдаарын билип алганнар. Дараазында Уголёк биле Ветерок деп ийи ыт космоска үш неделя «ажылдааш», чанып келгеннер.
Ол ышкаш космосче сарбашкыннарны, моортайларны, балыктарны, насекомнарны, улиткаларны база ужудуп үндүрген. А ийи языты-мелегей совет зондуга (зонд — организм, агаар азы хөрзүн шинчилээр тускай херексел) Айны долгандыр ужуткаш, рекордту тургускан — космоска 90 хонук турган!
«Шын» №28 2024 чылдың апрель 13
