Чыл санында майның 3 дугаар улуг-хүнүн бүгү делегейде СПИД аарындан когараан кижилерге тураскаадып, сактыышкын хүнү кылдыр демдеглеп турар. Аңаа хамаарыштыр СПИД-ке удур демисел төвүнүң ажылдакчылары Тываның ортумак өөредилге черлериниң сургуулдарынга 12 аңгы шөлчүгештерлиг квест-оюннарны эрттирип, эми тывылбаан ВИЧ аарыының дугайында тайылбыр ажылын чоруткан.
СПИД төвүнүң профилактика салбырының эргелекчизи Наталья Филкованың чугаалап турары-биле, республикада ВИЧ аарыы нептереп турар. 2023 чылдың май 3-түң байдалы-биле Тывада 265 ВИЧ аарыглыг хамаатылар бар. 2023 чылдың январьдан апрель айларында 14 чаа таварылга илереттинген. Эрткен чылга бодаарга, 75 хуу чедир өзүлделиг болган. ВИЧ аарыы нептереп турарын кижи бүрүзү билген турары чугула дээрзин ол демдеглээн.
Квест оюннарынга 12 команда киришкен. Сургуул аныяктар түңнел оюннарга чедип алыр дизе, ВИЧ болгаш СПИД дугайында янзы-бүрү бодалгалар болгаш даалгаларны кылыр ужурлуг турган. Оюннарның түңнелинде оларның ВИЧ болгаш СПИД дугайында билиглер-биле чепсеглеттинген болур ужурлуг деп организакчылар дыңнадып турар.
Оон ыңай экспресс-тест-биле ВИЧ аарыының бар-чогун дүргени-биле илередир лабораторияга бүгү киржикчилер болгаш күзелдиг кижилер салаа бажындан хан азы боостаазындан чараа анализи таварыштыр илередип болур аргаларны СПИД төвү тургускан.
/ А. ДОНГАК.
Ада ТЮЛЮШТУҢ тырттырган чуруктары.
