Тываның Баштыңы Владислав Ховалыг ажыл-албан аайы-биле Москвага сургакчылап баргаш, Россия Федерациязының спорт сайыды Михаил Дегтярев-биле ужурашкан.
Ажыл-агыйжы ужуражыышкын үезинде Владислав Ховалыг Россияның спорт сайыдынга Кызыл кожууннуң төвү Каа-Хем суурда улуг культура-спорт комплекизиниң тудуун 2025 чылда доозар дээш, кылып чорудуп турар тудуг ажылдарының дугайында чугаалап берген. РФ-тиң Чазааның болгаш Россияның Спорт яамызының деткимчези-биле үр үе иштинде тудуп келген спорт объектизиниң тудуун доозар, ону ажыглалга киирер байдал тургустунганын Тываның Баштыңы демдеглеп, дуза дээш өөрүп четтиргенин илереткен. Ада-чурттуң Улуг дайынынга Тиилелгениң 80 чылында болгаш Ада-чурттуң камгалакчыларының чылында ажыглалга киирер бо культура-спорт комплекизин “Тиилелге” деп адаанын, ооң байырлыг ажыдыышкыны чайын болурун Владислав Ховалыг дыңнаткаш, ооң байырлыг ажыдыышкынынче РФ-тиң спорт сайыды Михаил Владимирович Дегтяревти чалаан.
“Тиилелге” деп адаан улуг культура-спорт комплекизи Тывага спорттуң аңгы-аңгы хевирлерин хөгжүдеринге, республиканың спортчуларының спортчу мергежилин болгаш арга-дуржулгазын сайзыраңгайжыдарынга, Россия болгаш делегей чергелиг маргылдааларга Тываның болгаш Россияның спортчу ат-алдарын камгалаарынга улуг ужур-дузалыг болурун Владислав Ховалыг чугаалаан. Чаа культура-спорт комплекизинге Россия, харын-даа мырыңай делегей чергелиг маргылдааларны эрттирип болурун дыңнаткаш, Россия чергелиг улуг маргылдааларны организастап эрттирериниң арга-дуржулгазы бистиң республикада барын, хостуг хүрешке Россия чергелиг маргылдааны, эрткен чылда ча адарынга Россияның чемпионадын эрттиргенин чугаалаан.
Россияның Спорт яамызының программалары ёзугаар спортка инвестиция салыышкыннарын хаара тударынга Тыва идепкейлиг киржип турар. Эштир бассейннерни, модульдуг спорт залдарын болгаш “угаанныг” спорт шөлдерин бөлүктээш, Кызыл хоорайга спортчу кластерни 2025 чылда тургузуп эгелээр. Кожууннарга спорт инфраструктуразын сайзыраңгайжыдарынга инвесторларның акша-хөреңгизин база киириштирип турар. Чижээлээрге, Эрзин суурда улуг күш-культура болгаш спорт залының тудуу чоруп турар. Ооң тудуунга 90 сая рубльдиң инвестицияларын аңгы-аңгы дөстерден хаара тудар.
Россияның Спорт яамызының программаларынга республиканың киржилгезин Тываның Баштыңы социал четкилерде бодунуң арынынга бижээш, үстүнде айытканы ажыл-херектер спорттуң бүгү хевирлерин нептередиринге идиглиг болурун айыткан. Ындыг чүүл спорттуң аңгы-аңгы хевирлеринге бүгү российжи болгаш регионнар аразынга шаңналдыг черлерни бистиң спортчуларывыс үргүлчү чаалап алыр байдалды тургускан. Чижээлээрге, 2024 чылда сумо хүрешке Россияның чемпионадынга, кулаа дыңнавас мөгелерниң аразынга Россияның бирги чери дээш маргылдаага Тываның мөгелериниң командалары бирги черни ээлээннер.
Кызыл кожууннуң төвү Каа-Хем суурда Тиилелге аттыг улуг культура-спорт комплекизи ажыглалга кирерге, Тывага спорт болгаш күш-культура улам хөгжүүр, бистиң спортчуларывыс улуг маргылдааларга тиилелгелиг киржиринге бүзүрелин Тываның Баштыңы Владислав Ховалыг илереткен.
Ш. ЛОПСАҢ белеткээн.
Чурукту ТР-ниң Чазааның сайтызындан алган.
“Шын” №5 2025 чылдың февраль 13
