Чоокта чаа Кемерово хоорайга Сибирь федералдыг округтуң дзюдо маргылдаазы болган. Ол маргыдаага юниорлар аразынга алдын медальды Түмен Ондар чаалап алгаш, спорт мастеринге нормативти күүсеткен. Спорт мастерин күүседип алырга-даа, ооң документизин алыры дыка берге, чыл-чылы-биле манаар. Эрткен чылын акызы Тумат спорт мастеринге нормативти күүседип каарга, Россияның спорт мастери атты бо чылын чаа бергени ол.
Түмен биле Тумат – ийис алышкылар-дыр. Чаңгыс угда ийистер спорт мастери апаары бистиң төөгүвүсте ховар таварылга. Амгы үеде алышкылар хүрежиринден аңгыда, Кызылдың транспорт техникумун база доозуп алганнар.
Түмен биле Тумат ийистерниң улуг акызы Начын Ондар Украинада тускай шериг операциязында. Начын Красноярскының көдээ ажыл-агый университедин дооскаш, 55-ки мото-адыгжы (даг) бригадазынче ажылдап кирген. Ам ында 7 чыл ажылдап туры ол. Начын боду дзюдога спорт мастери. Ол Луганск облазының тускай шериг медалы-биле база РФ-тиң Камгалал яамызының «Суворов» ордени-биле шаңнаткан.
Ийистерниң ортун акызы Найыр Ондар Краноярскының Сибирь федералдыг университедин эрткен чылын дооскаш, биче лейтенант эргени алган. Ол база-ла спорт мастеринге кандидат. Найыр база ТШО-да шериг хүлээлгезин эрттирип турар.
Алышкыларның иези Чечеккей Коош-ооловна Барыын-Хемчиктиң Эрги-Барлык чурттуг. Ол «Лунсин» компанияда ажылдап турар. А адазы Сүт-Хөлдүң Кызыл-Тайга чурттуг Салим Дамбаевич Ондар. Ол таксистеп ажылдап чоруур. Салим Дамбаевич шериг албан-хүлээлгезин Узбекистанга эрттирип турда, Арменияга коргунчуг чер шимчээшкини болган. Ынчан Спитак хоорайга чок болган, бертик-межел чонга дуза кадар буянныг ажылдарга киржип турган.
Спортчу алышкыларның ада-иези оолдарының чедиишкиннеринге өөрүп, чоргаарланып чоруурлар.
Маадыр-оол ХОВАЛЫГ,
Тываның улустуң чогаалчызы.
Чурукту интернеттен алган.
“Шын” №7 2025 чылдың февраль 27
