“Тыва Республиканың спортчу элитазы – 2025” байырлыг ёзулал үезинде Тывага спортту хөгжүдеринге көскү үлүүн киирген спорт болгаш күш-культура ажылдакчыларын, спорт школаларының башкыларын, тренерлерни, бедик тиилелгелерни чедип алган спортчуларны алдаржыдып, оларга шаңналдарны Тыва Республиканың Баштыңы Владислав Ховалыг болгаш өске-даа удуртукчулар тывыскан.
Олимпийжи оюннарның программазынче киирген спорт хевирлеринге 2025 чылда маргылдаага чедип алган тиилелгелери дээш 12 спортчуга 30 муңдан 300 муң рубль, 10 тренерге 15 муңдан 150 муң рубль чедир акша шаңналдарының сертификаттарын берген.
Олар хостуг хүрешке эр мөгелер аразынга Россияның чемпиону Сайын Казырык, ооң тренери Буян Бүрбүчүк; хостуг хүрешке эр мөгелер аразынга Россияның чемпионадынга мөңгүн шаңналды чаалап алган Амир Чамзын, ооң тренери Даваа Ондар; хостуг хүрешке эр мөгелер аразынга Россияның чемпионадынга хүлер медальды чаалап алган Кежик Моңгуш, ооң тренери Айдаш Самдан; хостуг хүрешке херээжен мөгелер аразынга Россияның чемпионадынга хүлер медальды чаалап алган Алдынай Даржаа, ооң тренери Лориса Ооржак; хостуг хүрешке 23 хар чедир назылыг эр мөгелер аразынга Европаның бирги чери дээш маргылдаага мөңгүн медальды чаалап алган Бады-Маадыр Самдан; хостуг хүрешке 18 хар чедир назылыг эр мөгелер аразынга Делегейниң бирги чери дээш маргылдаага хүлер медальды чаалап алган Чиңгис Сарыглар, ооң тренери Меңги Моңгуш; хостуг хүрешке 24 хар чедир назылыг эр мөгелер аразынга Россияның бирги чери дээш маргылдааның тиилекчизи Аяндай Ондар, ооң тренери Отук Сат; хостуг хүрешке 24 хар чедир назылыг эр мөгелер аразынга Россияның бирги чери дээш маргылдааның хүлер медалын чаалап алган Күдер Моңгуш; хостуг хүрешке 21 хар чедир назылыг кыс мөгелер аразынга Россияның бирги чери дээш маргылдааның хүлер медалын чаалап алган Менди Шогжап, ооң тренери Айдың Достай; хостуг хүрешке 21 хар чедир назылыг кыс мөгелер аразынга Россияның бирги чери дээш маргылдааның хүлер медалын чаалап алган Тана Тюлюш, ооң тренери Аржаан Сарыг-оол; дзюдо хүрешке эр мөгелер аразынга Россияның чемпионадының хүлер медалын чаалап алган Каң-Демир Сүге-Маадыр, ооң тренери Темир Моңгуш; ча адарынга 21 хар чедир назылыг адыгжылар аразынга Россияның бирги чери дээш маргылдааның мөңгүн медалын чаалап алган Айдаш Ямбиль, ооң тренери Елена Достай.
Паралимпийжи болгаш Сурдолимпийжи оюннарның программазынче киирген спорт хевирлеринге 2025 чылда маргылдааларга тиилелгелерни чедип алган спортчуларга 50 муңдан 100 муң рубль, оларның тренерлеринге 25 муңдан 50 муң чедир акша шаңналдарының сертификаттарын тывыскан: дзюдо хүрешке кулаа дыңнавас херээжен мөгелерниң аразынга Россияның чемпиону Дженни Чамыян, ооң тренери Кудес Зайцев; дзюдо хүрешке кулаа дыңнавас херээжен мөгелерниң аразынга Россияның чемпионадының мөңгүн медалын чаалап алган Айлак Бойгал, ооң тренери Чойгана Ооржак; хостуг хүрешке кулаа дыңнавас эр мөгелерниң аразынга Россияның чемпионадының мөңгүн медалын чаалап алган Доржу Моңгуш, ооң тренери Артыш Доржу; хостуг хүрешке кулаа дыңнавас эр мөгелерниң аразынга Россияның чемпионадының мөңгүн медалын чаалап алган Эртине Түлүш; хостуг хүрешке кулаа дыңнавас эр мөгелерниң аразынга Россияның чемпионадының хүлер медалын чаалап алган Экер Сат, ооң тренери Евгений Дүвендей; хостуг хүрешке кулаа дыңнавас эр мөгелерниң аразынга Россияның чемпионадының мөңгүн медалын чаалап алган Байыр Ондар.
Олимпий оюннарының программазынче киирбээн спорт хевирлеринге 2025 чылда бедик тиилелгелери дээш 70 муң рубльдиң акша шаңналдарының сертификаттарын дайынчы спорт хевиринге (ММА) Россияның чемпиону Очур Барыннайга, сумога Россияның чемпионнары Бады-Эртине Даңгытка, Айдың Даржаага, Хүлер Түлүшке, Сайын-Белек Түлүшке, Айдың Моңгушка, эр спортчулар аразынга кикбоксингиге Россияның чемпиону Төрепчи Доңгакка, кикбоксинге херээжен спортчулар аразынга Россияның чемпиону Сайлык Салчакка берген.
Бедик мергежилдиг спортчуларны белеткээринге боттарының көскү үлүүн киирген тренерлерге номинация аайы-биле шаңналдарны тывыскан. “Олимпийжи спорт хевирлеринге эң тергиин тренер” шаңналга Олимпийжи курлавырлар спорт школазының улуг тренери Алибек Хомушку, “Олимпийжи эвес спорт хевирлеринге эң тергиин тренер” шаңналга Ак-Довурак спорт школазының тренер башкызы Мөңгүн-оол Иргит, “Адаптивтиг спорт хевирлеринге эң тергиин тренер” шаңналга кулаа дыңнавас уругларның спорт школазының тренер башкызы Чойгана Ооржак, “Бичии уруглар спортунуң эң тергиин тренери”шаңналга Чечен-оол Моңгуш аттыг спорт школазының тренер башкызы Мерген Моңгуш, “Национал спорт хевирлериниң эң тергиин тренери” шаңналга Спорттуң национал хевирлерин хөгжүдер школаның тренер башкызы Соломон Сарыглар, “Күш-культураның болгаш спорттуң эң тергиин башкызы” шаңналга Ак-Довурак хоорайда “Өлчей” лицейниң башкызы Айдыс Сарыглар олар төлептиг болганнар.
Спорттуң хевирлериниң аайы-биле номинацияларга эң дээре спортчуларны илереткен. “Национал хүрешке эң тергиин” номинацияга тиилекчи “Наадым-2025-ке” шүүлген Мөңге-Эртине Куулар. “Аът чарыжының национал хевиринге эң тергиин” номинацияга “Наадым-2025-ке” аъды мурнап келген Эрес Эртине төлептиг болган. “Мерген адыгжы” номинацияның тиилекчилери Сылдым Мерген биле Шеңне Даржай. “Адаптивтиг спортка эң тергиин” номинацияга тиилекчи Россияның алдарлыг спорт мастери, Россияның каш дакпыр чемпиону Дженни Чамыян. “Профессионал спортка эң тергиин спортчу” номинацияга тиилекчи кикбоксингиге Россияның спорт мастери, WF лиганың чемпиону Ренат Ондар.
Элээди спортчулар аразынга “Тываның идегели” номинацияның шаңналын 17 хар чедир назылыг оолдар аразынга хостуг хүрешке Делегейниң бирги чери дээш маргылдаага хүлер медальды чаалап алган Чиңгис Сарыгларга, “Спортта эпоха” номинацияның шаңналын ССРЭ-ниң спорт мастери, спортчу хүрештерниң аңгы-аңгы хевирлеринге хоочун мөгелер аразынга Россияның каш дакпыр чемпиону, Узбекистанга болуп эрткен хоочуннар аразынга самбога Делегей чемпионадынга 3-кү черни чаалап алган Анатолий Кара-Салга тывыскан.
2025 чылда бедик чедиишкиннерлиг болган спорт федерацияларын, спортчу командаларны, спорт школаларын, спортчу клубтарны номинациялар аайы-биле шаңнап-мактаан.
“Массалыг информация чепсектеринге спортту чырыдарынга эң тергиин организация” номинацияның тиилекчизи “Тывамедиагрупп” медиахолдинг болган.
“Тиилелге” спорт-культура төвүнүң ажыдыышкыны спорт болгаш уран чүүлдүң хөй кижи киржикчилиг солун байырлалы болган.
/ Ш. ЛОПСАН.
Чингис СААЯНЫҢ тырттырган чуруктары.
“Шын” №50 2025 чылдың декабрь 25
