"Херел" спорт залынга база "Сүбедей" спорт ордузунга октябрь 25–26 хүннеринде Спортчу фестивальдар болуп эрткен.
Спортчу фестивальдар дээрге “Спорт — чуртталганың хемчээли”, “Чаштар спорту”, “Школачыларның, студентилерниң спорту”, “Амгы база келир үениң спорту” деп төлевилелдерни боттандырары-биле элээди оолдар, уруглар аразынга республика чергелиг хостуг хүреш, херээжен хүреш, кудумчу баскетболу база тыва хүреш маргылдаалары-дыр. Спортчу хемчегни ТР-ниң Өөредилге база Спорт яамыларының, “Чаңгыс демниг Россия” партиязының болгаш республиканың Спортчу хүрештер, Баскетбол федерацияларының деткимчези-биле солун, бедик көдүрлүүшкүннүг байдалга организастаан.
Фестивальга киржип келген чалыы спортчуларны деткиири-биле, хүндүлүг аалчылар: ТР-ниң спорт сайыдының бирги оралакчызы Саян Монгуш, “Чаңгыс демниг Россия” партиязының кежигүнү, Дээди Хуралдың депутады Начын Чамбалдоо, Кызыл кожууннуң чагырыкчызы Белек Уйнукай, хостуг хүрешке Россияның алдарлыг спорт мастери Опан Сат, спортчу хүрештер чөвүлелиниң даргазы Буян Бурбучук дээш өскелер-даа ажыдыышкынга сөс ап, төлептиглерни шаңнап-мактаан.
“Хүреш — школада” деп төлевилелди боттандырары-биле, эгелеп чоруур база дуржулгалыг 200 хире чалыы мөгелер солун хүрешти көргүзүп, аарыкчыларының хей-аъдын көдүрүп, декабрь 15-те Москвага эртер түңнел оюннарга киржир эрге дээш хүрешкеннер. Түңнелинде, фестивальдың түңнел маргылдаазынга киржир эргени дараазында мөгелер чаалап алганнар.
Оолдар аразынга: 35–38 килге – Шагаамай Күжүгет, 41–44 килге – Ай-Демир Ооржак (Барыын-Хемчиктиң чалыы мөгелери), 47–50 килге – Чимит Салчак (Кызыл кожуун), Санчай Ооржак (Барыын-Хемчик), 67–70 килге – Ай-Белек Хертек (Эрзин).
Кыс уруглар хүрежинге: 32–35 килге – Шеңне Кара-оол (Мөңгүн-Тайга), 38–41 килге – Алдына Кыргыс (Улуг-Хем), 44–48 килге – Санхаана Серен-Доржу (Өвүр), 51–54 килге – Алдын-Сай Данзын-оол (Бай-Тайга), 57–60 килге – Дана Монгуш (ОКСШ), 62–65 килге – Виолета Саая (Мөңгүн-Тайга).
Республика чергелиг “3х3” деп кудумчу баскетболунуң фестивалынга 12 уруг, оолдар командалары киришкен. Россияда бо төлевилелдиң удуртукчузу Күрүне Думазының депутады, кайгамчыктыг фигурист Ирина Роднина болуп турар. Девискээр маргылдаазы “Чаңгыс демниг Россия” партиязының удуртулгазы-биле болуп эрткен. Түңнелинде, шаңналдыг черлерни дараазында командалар алганнар: 1 дугаар черни “Сүбедей” командазы алгаш, декабрь айда Москвага түңнел оюнга киржир болган, 2-ги черде – Барыын-Хемчик, 3-кү черни – Каа-Хем суур. Уруглар аразынга 1 дугаар черже Кызыл хоорайдан Аргамчы командазы үнгеш, түңнел оюнга киржир эргени алган, 2-ги черде – Тес-Хем, 3-кү черни – Чөөн-Хемчик.
Октябрь18–19 хүннеринде Уфа хоорайга бо чылдың август айда ажыглалче чаа кирген, Россияда эң улуг “Хүреш ордузунга” ХII “Россия спортчу күрүне” деп делегей чергелиг шуулган болган. Россияга спорттуң национал хевирин эрте чаштан сайзырадыр талазы-биле төлевилелди боттандырар сорулга-биле эрттирген. Бо төлевилел бистиң республикада шуудап, тыва хүреш школаларда, ортумак база дээди өөредилге черлеринде, кожууннар аразында хөгжүп турары улуг чоргаарал.
Республикада спорттуң национал хевирин сайзырадыр төп октябрь 26-да "Херел" спорт залынга школалар аразынга “Хана-Хана” деп маргылдааны 13 команда аразынга эрттирген. Командага 5 аңгы назы-харлыг шыырак мөгелер хүрешкеннер. Түңнелинде, 1-ги черге “Алдар-1” спортчу клубтуң командазы төлептиг болган. Команданың кежигүннери: Чамыян Кара-Сал, Лопсан Монгуш, Соруктуг Ондар, Күдер Ховалыг, Рамзан Монгуш. Ийиги черде: “Алдар-2” спортчу клуб: Батый Оюн, Ай-Белек Хертек, Начын Чооду, Сайа Куулар, Чаян Дагба.
3-кү черде: 5 дугаар гимназияның 2 командазы: Чылгычы Күжүгет, Айрат Булчун, Аюш Кара-Сал, Сенгил Салчак, Александр Бады-Хөө.
Шаңнал кирген командалар диплом, медаль база өртектиг белектерге төлептиг болганнар.
Алексей ЧАМБАЛ-ООЛ.
Чуруктарны интернет четкизинден алган.
“Шын” №83 2024 чылдың октябрь 30
