Бичии мячилиг хөккей маргылдаазы. "Сүбедей" спорт ордузунга март 14–15 хүннеринде хоочуннар аразынга бичии мячилиг хөккей маргылдаазынга кызымаккай, чараш ойнааш, шаңналдыг черлерни дараазында командалар үлешкеннер: бирги черни Аксы-Барлык, 2-ги черни Баян-Тала, 3-кү черни Ак-Туруг тус-тузунда алганнар.
Хаак-биле маңнаар марафон. Тайга станциязынга март 15-те хаак спортунуң 8 дугаар “Снежный барс. Ирбиш” деп марафонга 117 хаакчы киришкен. Түңнелинде, эр улус аразынга 50 км хемчээлге ийи чыл улай Красноярскының хаакчызы Анатолий Шевченко 1-ги черже үнген. Ооң көргүскен үези 2 шак 10 минута — рекордка дүгжүп турар болган. Херээжен хаакчылар аразынга 30 км хемчээлди, 1 шак 38 минутага келген Москваның спортчузу Светлана Березань алган.
ММА-ге СФО-нуң чемпионады. Томск хоорайга март 14–15 хүннеринде СФО-нуң чемпионады база бирги чери дээш ММА маргылдаазы спортчу тура-сорук көдүрлүүшкүннүг байдалга болуп эрткен. Аңаа Тываның спортчулары чиик килдерге күштүүн база катап бадыткааннар. Тыва спортчулар бо удаада 8 медальга төлептиг болганнар. Элээди 16–17 харлыг оолдар аразынга бүзүрелдии-биле бирги черни Дажы-Суу Сарыглар база Ананды Күдерек алганнар. Ынчангаш Россияның спорт мастеринге кандидат деп аттарны күүсеткеннер. Удавас апрель айда Россияның бирги чери дээш маргылдаага киржирлер.
Улуг эр спортчулар аразынга Сайын-Херел Кончукпан бодунуң килинге 1-ги черни ап, чемпион атка төлептиг болган. Шаңналдыг 2-ги черни Оттук Сегбелдей, Кудер-Мерген Тувет-оол, Очур Барынай алганнар, 3-кү черлерни Ай-Херел Эней база Начын Ооржак алганнар. Түңнелинде, 1–2 дугаар чер алган спортчулар Россияның чемпионадынга база Кубогунга киржир эргени чаалап алганнар.
/ А. ЧАМБАЛ-ООЛ.
Чуруктарны авторнуң архивинден алган.
“Шын” №10 2025 чылдың март 20