Март 20-де Тыва Республиканың Дээди судунуң президиумунуң болгаш Тыва Республикада Суд департаментизиниң эргелелиниң каттыштырган хуралы Тываның Дээди судунуң бажыңынга болуп эрткен. Хуралга Тыва Республиканың Дээди судунуң президиумунуң болгаш Тыва Республикада Суд департаментизиниң эргелелиниң, район судтарының болгаш эптештирилге судтарының, Тыва Республиканың суд участоктарының болгаш хоойлу-дүрүм камгалалының албан черлериниң удуртукчулары киришкен.
Тыва Республиканың Дээди судунуң президиумунуң болгаш Тыва Республикада Суд департаментизиниң эргелелиниң каттыштырган хуралының ажылын Тыва Республиканың Дээди судунуң даргазы Валерий Ондар ажыдып, Тыва Республиканың ниити юрисдикциязының судтарының 2025 чылда ажылының түңнелдериниң дугайында илеткээн. Республиканың ниити юрисдикциязының судтарының ажылы 2025 чылда экижээнин, херектерни судтарга сайгарып көөрү дүргедээнин демдеглеп, 2024 чылдыынга деңнээрге, 2025 чылда 9074 санга көвүдээнин илеткелчи дыңнаткан.
Тыва Республиканың Дээди судунуң президиумунуң болгаш Тыва Республикада Суд департаментизиниң эргелелиниң каттыштырган хуралынга олуржуп, сөс алган Тыва Республиканың Чазааның Даргазының оралакчызы Уран-оол Ондар, Тыва Республика талазы-биле кол федералдыг инспектор Александр Вавилихин, Тыва Республикада Суд департаментизиниң эргелелиниң начальниги Д. Успенский, Тыва Республиканың Дээди Хуралының хоойлу-дүрүм политиказы болгаш тус чер бот-башкарылга талазы-биле комитединиң даргазы депутат Людмила Осмоловская дээш өскелер-даа суд органнарының 2025 чылда ажылы ниитизи-биле багай эвес деп демдеглеп, регионга хөй-ниитиниң хоойлу-дүрүм камгалалын улам быжыглаар талазы-биле кылып чорудар ажылдарже судьялар корпузунуң кичээнгейин угландырганнар.
2025 чылда регионда судтарының ажыл-чорудулгазының түңнелдериниң дугайында медээлерни Тыва Республиканың Дээди судунуң албан ёзузунуң сайтызынга киирер.
Ш. МОҢГУШ.
Буян ООРЖАКТЫҢ тырттырган чуруктары.
