Суг-Бажында арага сатпастаан.

Тываның чурттакчылыг көдээ суурларында арага аймаан ижерин эвээжедиринче чонну кыйгырып, кем-херек үүлгедиишкиннериниң санын эвээжедир сорулга-биле мөөрейни эрттирип турарын ТР-ниң Чазааның доктаалында айыткан.

Мөөрейниң хемчеглеринде көдээниң чонунуң хөй-ниити ажылдарынга идепкейин көдүрүп, сумуда тус чер бот-башкарылгазының органнары-биле кады ажылдажылгазын күштелдирери көрдүнген. Оон аңгыда, арага аймаан ижерин эвээжедиринче угланган ажылдың ачызында “эзирик” кем-херектер санын эвээжеткен муниципалдыг черлерниң эки арга-дуржулгаларын илередип, ону нептередир сорулганы мурнунда салган.

2022 чылдың эгезинде республиканың элээн хөй сумулары мөөрейге киржири-биле “Элээр суур” деп чарлаттынгаш, арагага удур ажылды күштелдирген. Оларның аразында Каа-Хем кожууннуң Суг-Бажы сумузу база арагага удур идепкейлиг демисежип турар. “Февраль 24-те бүгү чон хуралынга чаңгыс дем-биле суурувусту “Элээр суур” кылдыр бадылаан бис. Бистиң суурувус Каа-Хем кожуунда база бир үлегерлиг суурларның бирээзи кылдыр санаттынып турар. “Элээр суур” кылдыр чарлаар үзел-бодалды киирген чылдагааны – өзүп олурар салгалдарга кадык- чаагай амыдыралды көргүзери” – деп, Суг-Бажы сумузунуң чагырга даргазының социал политика талазы-биле оралакчызы Элина Ондар чугаалаан.

Ук төлевилелдиң кол угланыышкыны кадык амыдырал болганда, спортка хандыкшылды бедидип, чурттакчы чоннуң сагыш-сеткилин көдүрүп, арагага удур чырыдыышкын ажылдарын чорудуп турар. Ылаңгыя культурлуг болгаш спортчу хемчеглер удаа-дараа план ёзугаар болуп эртип турар. Аңаа даянып Суг-Бажы сумузунуң албан черлери болгаш чурттакчы чону арагага удур митингини база кылган.
Кожууннуң суурларындан амыдыралының аайы-биле "аскап" чоруур, араганың агымынче кире берген херээжен чонун, Тываның сагыл четтирген алдарлыг кижилерин чалааш, “төгерик столду” эрттирген дээрзин Элина Ондар демдеглээн. Чалаткан аалчылар боттарының амыдыралындан дириг чижектерни көргүзүп тургаш, арга-сүмезин катканнар.

Ол ышкаш улуг назылыг өгбелер чагыг-сүмезин берип турар видеоларны тырттыргаш, сумунуң сайтызында доктаамал салып турар. Ооң кол сорулгазы бичии уруглардан эгелээш, улуг улуска чедир арагада эки чүве чок дээрзин медереп билиндирери болур.
Ук сумуну “элээр суур” деп чарлааш, чогуур хемчеглерни чоруткан соонда, ийи садыг арага садарындан ойталаан. Ындыг-даа болза хыналданы доктаамал чорудуп турар. Ооң уламындан суурнуң чаагайжыдылга ажылдары экижээн. Сөөлгү 9 ай дургузунда арага-биле холбаалыг кем-херек үүлгедиишкиннери бүрүткеттинмээн.

Чыжыргана СААЯ
Буян ООРЖАКТЫҢ тырттырган чуруу