Польшага сентябрь 7–8 хүннеринде сумога делегей чемпионады болуп эрткен.
Аңаа Кыргыс Республиканы төлээлеп 18 харлыг Сүлде Донгак аар килдиг мөгелер аразынга эки хүрешкеш, шаңналдыг 3-кү черни алгаш, хүлер медальга төлептиг болган. Бо дээрге Сүлдениң делегей чемпионаттарынга 2 дугаар хүлер медалы-дыр. Сүлдениң килинге моол мөге Бадрал Баасан-дорж делегейниң 3 дакпыр чемпиону болган. Маргылдаа соонда моол мөге Сүлдеге келгеш, келир чылын чемпион болур сен дээш, сеткилинден байыр чедирген.
Сүлде сумо хүрешке делегейниң 2 дакпыр чемпиону, тыва хүрешке Күчүтен мөге Аяс Монгуш даайының хояр аргаларын ажыглап турары өөрүнчүг.
Сочиге ол-ла хүннерде “Кара далайның Кубогу” деп Бүгү-россия чергелиг сумо маргылдаазынга бистиң мөгелеривис Сайын-Белек Тюлюш 115 килге чемпион болган. Ол ышкаш тулган тиилекчи деп хүрешке аныяк Начын мөге Юрий Кызыл-оол чемпионнаан, Чаан мөге Айдың Монгуш үжүүрлешкен.
Сентябрь 9-та Японияда “Императорнуң Кубогу” Макуути Аки басе деп дивизионда 15 шыырак сумоторийлер аразында маргылдааның 1 дугаар салыында Россиядан чаңгыс бистиң тыва мөгевис Амыр-Санаа Даваа бодунуң шыырак удурланыкчызы моол мөгени октааны улуг чедиишкин. Ам-даа 14 хүн иштинде үргүлчүлээр маргылдаага бистиң мөгевиске чедиишкиннерни күзедивис.
А. ЧАМБАЛ-ООЛ.
Чурукту интернеттен алган.
«Шын» №69 2024 чылдың сентябрь 11
