ТР-ниң Баштыңы Владислав Ховалыг ажыл-агыйжы сургакчылаашкынының үезинде РФ-тиң саң-хөө сайыдының бирги оралакчызы Леонид Горнин-биле ужурашкаш, Тываның амгы үеде бюджединиң күүселдезиниң дугайында чугаалашкан.
«Регионнуң Саң-хөө яамызы Россияның Саң-хөө яамызының департаментизи-биле чамдык билдинмес чүүлдерни тодарадып, шалың фондузунуң талазы-биле айтырыгларны өөренип көрүп, бүдүн чылдың түңнелдерин үндүрүп, бо неделяда кады ажылдаар дугайында дугуруштум» — деп, В. Ховалыг демдеглээн.
Регионнуң удуртукчузу Леонид Горнин-биле июнь айда Тывага болган үерниң уржуундан когараан оруктарның септелгезиниң дугайында база чугаалашкан.
«РФ-тиң Чазааның курлавыр фондузундан акша-хөреңги аңгылап бээр дугайында дилегни Чазак Даргазы Михаил Мишустинниң адынче киирген бис. Федералдыг комиссия сайгарган түңнелинде ниити когарал 260 сая рубль болган» — деп, Владислав Ховалыг медеглээн.
Чиигелделиг ипотека төлевилелиниң Тывага боттанылгазынга үлүг-хуузун киириштирип, Тываны деткээни дээш, Леонид Горнинге өөрүп четтиргенин Владислав Ховалыг илереткен.
«Чуртталга оран-савазының тудуун күштелдирип эгеледивис. Ынчалза-даа коммуналдыг инфраструктураларның объектилериниң элей бергени тудуг ажылын саададып турар. Тудуг адырынга хамаарыштыр улуг планнарлыг бис. Ынчангаш Кызыл хоорайның канализациязын аштап-арыглап, септээринге акшаландырыышкын бээр аргаларны өөренип көрүп, 2024 чылда эгелээр инвестициялыг программаже киирерин дилеп тур бис» — деп, Владислав Ховалыг саналдаан.
А. ОНДАР белеткээн.
"Шын" №57, 2023 чылдың август 2