Тываның күрүне университеди болгаш педагогика колледжи коронавирус аарыын болдурбас болгаш нептеревези-биле, РФ-тиң Эртем яамызының дужаалы езугаар март 18-тен эгелеп, ырактан интернет таварыштыр өөренип эгелээн. Өөредилге черинде Тываның кол санитар эмчизиниң даалгазы-биле вирустан камгаланыр болгаш ону таратпазының дүрүмнерин сагыыры-биле шупту байдалдарны тургускан.
Амгы үеде коронавирустуң тывылган чери Кыдаттан сургуулдар чок. Кышкы дыштанылга үезинде чорупкан хевээр, улаштыр февраль айдан эгелеп, ырактан интернет таварыштыр өөренир хевирже шилчиткен. Өске даштыкы чурттардан 61 сургуул өөренип турар, 53-ү Моолдан. Оларны Моолче чандырарын шиитпирлээн. Амгы үеде Тывада өөренип турар моол сургуулдарны ол тала хүлээп алырын, а бо таладан организастыг үдеп чорударын аразында дугуржуп турар.
ТывГУ-да хүндүскү салбырда 3500 болгаш кежээки салбырларда 1500 кижи өөренип турар. Шуптузунда интернет таварыштыр өөренир эптиг байдалды тургускан. Найысылалда сургуулдар боттарының бажыңнарындан, а хөй-ниити чуртталга черинде чурттап турар сургуулдарга интернетче кирер Wi-Fi-ни чедимчелиг кылдыр тургускан. Күзелдиг студентилер компьютер залынга санитарлыг дүрүмнү хажытпазы-биле хөй эвес бөлүктеп өөренир. Амгы үеде Россиядан дашкаар сургакчылаашкында сургуулдар чок.
Аржана ЧАМЗЫРЫН. #Шын