Кошкар (03.21–04.20)
Кошкарлар Чылан чылында ажыл-агыйынга депшиир, бодун сайзырадырынга чаа-чаа аргаларлыг болур. Олар чаа төлевилелдерни дидими-биле сегирип алыр болза ажырбас. Ынчалза-даа бүрүнү-биле бердинип, күжениишкинниг ажылдаарынга белен болур херек. Кыш төнчүледир ажыл-агыйыңарга болгаш бизнезиңерге ажык-дузалыг кижилерге таваржыр силер. Чазын немелде орулгалар болгаш чедиишкинниг инвестициялар дузазы-биле саң-хөө байдалы экижиир. Чылдың бирги чартыында хөй-ле кижилер-биле таныжып алыр силер.
Буга (04.21–05.20)
Бугаларны Чаа чылда сагыш-сеткил талазы-биле чаартылгалар манап турар. Чылдың баштайгы айларында шыңгыы шылгалдалар келир. Бодун туттунуп билир, шыдамык болуру чугула. Кандыг-бир шиитпир хүлээп алырда, интуициязынга бүзүрээни дээре. Ол шын орукту айтыр. Чазын ажыл-агыйыңарга саң-хөөге салдарлыг чүүлдер болур. Акшаңарны камнап, немей ажылдаар аргалардан дилеңер. Эки чаңчылдарга өөренири — эртенги хүнге бүзүрелиңер ол.
Ийистер (05.21–06.21)
Ийистерни кайгамчык өскерилгелер манап турар. Чыл эгезинде-ле олар мергежилиниң аайы-биле, ылаңгыя инвестиция талазы-биле болгаш өөредиглиг төлевилелдерге улуг чедиишкиннерни чедип алыр аргалыг. Идепкейжи чорууңар салбаңар. Чыл ортузунда ажыктыг сүмелер манап турар азы ажылыңарга депшиир силер. Күзүн ындыг-ла эки эвес үелер келир. Ынчан улуг оралдажыышкын кылбас, акша-хөреңги-биле оваарымчалыг болур. Кредиттер албас, акша талазы-биле чигзинчиг чүүлдер кылбас, каражага таваржып болур. Хоочу аарыгларлыг болза, сула салдынган ажыы чок. Кадыкшылын камнаар дизе, нерв системазын быжыглаар, чүрек-дамыр аарыгларынга салдарлыг багай чаңчылдардан адырлыр.
Рак (06.22–07.22)
Рактарга өг-бүлениң ёзу-чаңчылдарын быжыглаар үе. Бажың ажылынче болгаш чоок кижилериңерже кичээнгейни угландырыңар. Чыл эгезинде септелге кылырынга азы көжеринге таарымчалыг. Рактар чүгле сеткилинге кирер эвес, а орулга база эккээр чаа хоббилиг болур. Ажыл-агый талазында хөй ажыл-херек, ужуражылгалар, чугаалажыышкыннар манап турар. Ынчалзажок үе-шаанда дыштаныры чугула. Бүрүнү-биле дыштанып, удуп алыр үени тывары чугула. Ынчалза-даа ынчан манавааны дүвүрээзиннер кээп болур. Спорт-биле өңнүктежип, шын чемненип, кадыкшылыңарже кичээнгейден салыңар. Ниитизи-биле чыл чогумчалыг эртер.
Арзылаң (07.23–08.23)
Арзылаңнарга чыл кончуг эки эртер. Ол эрги частырыгларын эдип, чаа-чаа тиилелгелерни чедип алыр үе. Аңаа ажыл-агый талазы-биле чедиишкиннер база хамааржыр. Чаа организацияга ажылдаар арга тургустунар. Ол орулгага база улуг салдарлыг болур. Ынчангаш чыл эгези улуг харыысалга болгаш күжениишкин-биле эгелээр. Арзылаңнарның тергиидекчи чаңчылдарынга чаңгыс эвес удаа чигзиниишкиннер тургустунар. Аажы-чаңын эде көөр ужурга таваржыр. Бир-ле чүүл болдунмаза, хей черге күжүн үндүрген ажыы чок. Үези кээрге, ол чайгаар-ла шиитпирлеттине бээр. Бодунуң кадыкшылынче болгаш даштыкы хевиринче хөй кичээнгей салырын сылдыстар сүмелеп турар. Ол чүгле чараш болурунга эвес, а кадык байдалынга база салдарлыг болур. Арзылаңнарга чоок кижилери даянгыыш болуп, сорук киирер. Хөлүн эрттир чай чогунуң болгаш хорадаачалының ужун олар-биле билишпейн барып болур.
Кысчыгаш (08.24–09.23)
Кысчыгаштарга ынакшыл-даа, саң-хөө-даа талазынга чедиишкинниг болур. Ол бодунуң бодалдарын боттандырарынга, келир үеде чедиишкиннериниң быжыг таваан тургузарынга кончуг эки үе. Чыл ортузунда ажыл-агыйынга улуг өскерлиишкиннер болурун сылдыстар айтып турар. Чаа албан-дужаалче томуйлаар азы келир үеде кедилиг олутче шилчиир. Аай-дедир чоруктар көвүдээр. Бедик темпини кадагалап арттырар дизе, элээн каш дүрүмнерни сагыыры чугула. Баштай-ла уйгузун камнап алыры-биле хөглээшкиннерден ойталаар, шын чемненилгени сагыыр. Бүдүн хүнге күш четчир болуру-биле, ол кончуг хоолулуг болгаш янзы-бүрү болур ужурлуг. Хууда амыдыралыңар кончуг оожум болур.
Деңзилер (09.24–10.23)
Деңзилерге хөй-ле хуулгаазыннарлыг чыл болур. Чыл эгезинде солун төлевилелдер, улуг хемчээлдиг культура болуушкуннарга киржилгелер, солун аян-чоруктар манап турар. Хөй ажыктыг кижилер-биле таныжып алыр. Чедиишкин боду чедип келирин манаан ажыы чок. Идепкейлиг болуру чугула. Акша-хөреңгизин таптыг чарып билир болза, саң-хөө талазы-биле чогумчалыг чыл болур. Материалдыг талазын инвестициялар болгаш ажыктыг төлевилелдер дузазы-биле экижидер аргалыг. Ижин-баар, тыныш болгаш чүрек-дамыр органнарынче кичээнгейни угландырар.
Ээремчик (10.24–11.22)
Ээремчиктерге диңмиттиг болгаш чай чок чыл болур. Чааскаанзыргай Ээремчиктер хөй-ле солун кижилер-биле таныжып, чаа ынакшыл харылзаазынче бажы-биле кире бээр. Дүлгээзин күштүг болур. Ынчангаш өг-бүлелиг Ээремчиктер оваарымчалыг болза эки. Кандыг-даа таварылгада бүдүн чыл дургузунда удурланышкак хиндиктиг кижиниң кичээнгейинге ол бүргедир. Чамдыктарынга ол кады чурттаан эжи-биле хөй үе эрттирер, а өскелеринге аразында харылзаазының быжыын хынаар чылдагаан болур. Чыл дургузунда өг-бүлезинде чөрүлдээлер шиитпирлээр, дугуржулгалар дилээр, берге шилилге кылыр ужурга таваржыр. Бодунуң чаңчыккан чүүлдеринге сонуургалы чидип, шылап болур. Ол бүгүнү үе-шаанда эскергеш, бодунуң байдалын баксыратпазын кызытса эки.
Адыгжы (11.23–12.21)
Адыгжылар Чылан чылында мергежилиниң талазы-биле хенертен келир ужудуушкуннарга таваржыр. Чаа-чаа чогаадыкчы ажылдарының болгаш кол компаниялар-биле чарган керээлериниң ачызында ажыл-агыйынга депшиир, саң-хөө талазы-биле байдалы экижиир. Адыгжылар бодунуң идеялары болгаш кылган ажылдарының ачызында делегей чергелиг үнелээшкин алыр. Ол ооң алдар-адынга эки. Баштайгы айлар өг-бүле байдалын өскертиринге таарымчалыг. Куда дүжүрер, чара бадыланчырын бо үеже планнап алыңар. Чугаакыр, хөй билиглиг болганы-биле, Адыгжыларның мөгейикчилери көвүдээр. Үргүлчү чай чок, сургакчылаарының уржуундан чөрүлдээлер тургустунуп, өг-бүле байдалынга салдар чедирер. Бүдүн чыл дургузунда кадыыңар байдалы кончуг эки болур. Ынчалза-даа кошкак талаңар – чүстериңер дээрзин утпаңар.
Те (12.22–01.20)
Чыл эгезинде Телер ажыл-агыйында-даа, хууда амыдыралында-даа чаңгыс черде тапталы берген эрги аргаларны эде көөр апаар. Ажылынга коллегалары болгаш удуртулга-биле чөрүлдээлер, а өг-бүлезинге чоок кижилери-биле аас былаажып болур. Бодунуң шынчы чоруун бадыткаары-биле, кайы-даа талага эп-найыралды тударда, шиитпирлиг болгаш чүнү-даа баш удур бодап билир, идепкейлиг болуру чугула. Хостуг Телер ажыл-агыйында бергелер турда-даа, ынакшыл күзеп, чаа кижилер-биле таныжып алыр арганы эрттирбес. Чай чоокшулаарга, Телерниң ынакшылы кол деткикчизи апаар. Дүвүрээзиннер, бергелер хөй-даа болза, бодунуң сагыш-сеткилиниң байдалынче кичээнгейни салыры чугула. Бергелер чаа оруктарны ажыдар дээрзин Телер утпас болза эки. 2025 чыл ооң бадыткалы болур.
Суг-Саарар (01.21–02.20)
2025 чыл Суг-саарарларга хууда сайзыралды сөңневишаан, улуг шылгалданы эккээр. Ол немей эртем чедип, чаа чүүлдерге өөренип алырын бодандырыптар. Күжениишкинниг ажылдааннарның орулгазы көвүдеп, ажыл-албанынга депшилгени сылдыстар баш удур көрүп турар. Хууда чуртталгазы аянныг апаар. Чазын, чайын романтика манап турар. Өг-бүлелиг улустуң шилип алган кижизи сеткилиниң ханызындан оларны деткиир. Ооң уламындан аразында харылзаазы быжыгар. Амыдыралында чугула өскерлиишкиннер кадыкшылынга база салдарлыг болур. Ынчангаш спорт-биле өңнүктежип, арыг агаарга селгүүстеп, медитациялап тургаш, баш удур камнаныр херек.
Балыктар (02.21–03.20)
Балыктарга харыысалгалыг болгаш амыр-дыш чок үелер келир. Ынчалза-даа нарын айтырыглар чоорту шиитпирлеттинип, чуртталгазы чаа деңнелче көдүрлүр. Чаа чыл оларның чаңгыс үзел-бодалдыгларын тып, чугаалажыр кижилерин көвүдедир. Частан бээр ажыл-агыйынга депшилгениң оруктары ажыттынар. Чаа төлевилел уштап-баштаарын сүмелээр азы бедик албан-дужаалга томуйлаар чадавас. Май айдан бээр саң-хөө байдалы экижиир. Бюджет планнаарын, бодамчалыг акша чарыырын уттуп болбас. Көжер-дүжер, куда дүжүрер азы өг-бүлезинге немелде болур чадавас. Күзүн, кыжын түңнел үндүрер, бурунгаар сорулгалар салыр үе болур. Кадыкшылын быжыглап, сагыш-сеткилиниң маажым байдалын кадагалаар херек.
/ Чыжыргана СААЯ белеткээн.
“Шын” №100 2024 чылдың декабрь 28