Бо чылдың март 6-ның хүнүнде Шагаан-Арыгның төп одалга черинге озал-ондак болган уржуунда хоорайда хөй квартираларлыг 62 бажыңнар болгаш төп одалга системазынган коштунган черде бажыңнар чылыг болгаш изиг суг-биле хандырылга чок арткан.
Тыва Республиканың Чазааның 2018 чылдың июль 5-те хүлээп алганы “Онза байдалдар үезинде Тыва Республиканың Чазааның курлавыр фондузундан бюджет акша-хөреңгизин үндүрериниң чуруму болгаш байдалдар дугайында” 352 дугаар доктаалы ёзугаар Шагаан-Арыг хоорайның төп одалга черинге болган озал-ондактың уржуундан когараан бажыңнар болгаш квартираларның ээлеринге 10 муң рубль түңнүг чаңгыс удаа акша дузазын чедирер шиитпирни Тываның Баштыңы Владислав Ховалыг хүлээп алган.
Бо шиитпирниң дугайында Шагаан-Арыг хоорайның чурттакчыларынга чарлап, Шагаан-Арыг хоорайның төп одалга черинге болган озал-ондактың уржуундан квартираларының болгаш бажыңнарының чылыг болгаш изиг суг-биле хандырылгазы үзүктелген деп санап турар хамаатылардан билдириишкиннерни хүлээп ап эгелээн. Билдириишкиннерни киирер чурум, оларга кожар документилер дугайында ТР-ниң Күш-ажыл болгаш социал политика яамызы, Улуг-Хем кожууннуң чагыргазының күш-ажыл болгаш социал хөгжүлде эргелели хамаатыларга чарлаан.
10 муң рубль түңнүг дузаламчы акшаны билдириишкин киирген кижи бүрүзүнге бербези чугаажок. Хамаатыларның билдириишкиннерин, оларга кошкан документилерни тускай комиссияның кежигүннери хынаар, ооң соонда 10 муң рубльди хамаатыга бээр азы бербезиниң дугайында шиитпирни хүлээп алыр. Чогум-на бо ажыл эң-не берге болган. Шагаан-Арыг хоорайның төп одалга черинге болган озал-ондактың уржуундан квартираларының болгаш бажыңнарының чылыг болгаш изиг суг-биле хандырылгазы үзүктелген деп санап турар хамаатылардан 6 700 билдириишкен кирген. Шагаан-Арыг хоорайның чурттакчыларының ниити саны 12 204 кижи. Хоорайның чурттакчыларының чартыындан хөй хамаатыларга чаңгыс удааның акша дузазын чедирер апаар-дыр. Дузаламчы акшаны алыксаан кижилер эвээш эвес. Олар дээрге квартираларын хөлезиге (арендага) берипкен хамаатылар, квартираны хөлезиге алган кижилер. Квартираларны хөлезиге берген азы алган дугайында документилерни хоойлу ёзугаар тургуспаанындан нарыыдаашкыннар база тыптып келген.
Республиканың күш-ажыл болгаш социал политика сайыдының оралакчызы Сылдыс Ондарның берген медээзи ёзугаар алырга, чоокку хүннерге чедир 6 700 билдириишкинни Шагаан-Арыг хоорайның чурттакчылары киирген, 1 174 хамааты дузаламчы акшаны алган. Бо хүннерде 5 526 хамаатының билдириишкиннери тускай комиссияның хыналдазында.
Ш. МОҢГУШ белеткээн.
Чурукту интернет четкизинден алган.
“Шын” №44 2024 чылдың июнь 15
