Маадырларныӊ аваларынга тураскааткан байырлыг хемчег Кызыл хоорайга болуп эрткен. «Ада-чурт камгалакчылары» фондунуӊ регионалдыг салбыры Авалар хүнүнге тураскааткан байырлыг хемчегни эрттирген.
Маадырларны төлептии-биле өстүрүп кижизиткен аваларга ТР-ниӊ Дээди Хуралыныӊ (парламентизиниӊ) болгаш Тываныӊ херээженнер эвилелиниӊ өмүнээзинден хүндүлел бижиктерни, ук фондунуӊ регионалдыг салбырыныӊ өөрүп четтириишкин бижиктерин тывыскан.
Байырлыг хуралга Таӊды, Улуг-Хем болгаш Барыын-Хемчик кожууннардан чалаттырган аалчылар келген. Кызыл-Мажалык суурдан келген Татьяна Адыг-оолга кичээнгей салган. Ай-Херел Адыг-оолдуӊ дайынчы хүлээлгезин күүседип тургаш, маадырлыы-биле мөчээниниӊ соонда, Эрес-дидим чоруктуӊ ордени-биле ноябрь 5-те шаӊнаан. Төрээн төлүнүӊ орден-хавыяазын энерелдиг ие ам-даа холдан салбайн чоруур.
Ада-чуртун камгалап чоруур шериглерниӊ аваларынга тураскааткан база бир байырлал Тываныӊ күрүне филармониязынга болуп турган. Авалар хүнүн таварыштыр бо хемчегни ТШО-га мөчээн маадырларныӊ аваларыныӊ комитеди организастаан.
Арынны Р. ДЕМЧИК белеткээн.
Чуруктарны интернет четкизинден хоолгалаан.
“Шын” №91 2024 чылдың ноябрь 27
