Хамааты ниитилелдиң хөгжүлдезинче угланган18 социал ужур-дузалыг төлевилелдиң авторлары-биле ужурашканын Тываның Баштыңы Владислав Ховалыг дыңнаткан. Оларның шуптузу108 чагыг киирген мөөрейниң тиилекчилери болуп, Тыва Республиканың Баштыңының грантыларының эдилекчилери болганнар.
"Чижээлээрге, Өкпе аарыглыг уругларга дуза көргүзер фонд үр үеде эмнелгеде эмнедип турар өкпе аарыглыг уругларга өөредилге кичээлдерин болгаш оларның хостуг үезин организастап турар. Тускай шериг операциязында киржип турар бистиң чаңгыс чер чурттугларывыстың өөнүң иштинге база ада-иелеринге психологтуг дуза чедирер талазы-биле республиканың Психологтар каттыжыышкынының кииргени төлевилел база бөгүн тоң чугула. Библиотеканың регион каттыжыышкыны тыва авторларның чогаалдарынга үндезилеп, радио-шиилерни тургузуп, шак ынчаар Тываның культура өнчүзүн камгалап кадагалаар үүле-херекке үлүг-хуузун киирип чоруур – деп, В. Ховалыг медеглээн. – "Бо чылын мөөрейниң акша-төгерииниң фондузун элээн көвүдедир аргалыг болдувус, төнчү түң 10 сая рубль болган. Грант алыкчыларының хөй нуруузунуң доктаамал ажылдаар оран-савазы чок дээрзи чугаалажылга үезинде билдинди. Бистиң эң идепкейлиг коммерцияга хамаарылга чок организацияларывыска тускайлаң оран-саваны аңгылап бээриниң арга-хоргазын өөренип көөр бис, доктааткан хуваалда-чурум езугаар олар аңаа боттарының ажыл-хемчеглерин эрттирип, бодалдарын боттандырар аргалыг болурлар.
Чогум-на шак мындыг ажаанзыралдыг, чону дээш сеткил-сагыжы дүвүреп чоруур кижилерни бирги ээлчегде деткиири чугула деп санап чоруур мен. Олар ниитилелге быжыг чөленгииш, эрге-чагыргага өмек-дөмек болуп турарлар. Мөөрейниң тиилекчилеринге төлевилелдерин чедиишкинниг боттандырарын база ажыл-чорудулгазы моон-даа соңгаар үре-түңнелдиг болурун күзедим”.