Владивосток хоорайга сентябрь 10–13 хүннеринде болуп эрткен Даштыкы экономиктиг харылзаалар шуулганынга Тываның Баштыңы В. Ховалыг Тываны таварты Моолче болгаш Кыдатче демир-орук тудуунуң төлевилелин Россияның транспорт сайыдының оралакчызы Валентин Иванов-биле чугаалашкан.
Ындыг кончуг ырак эвесте ук төлевилелдиң дугайында катап чугаалажып эгелээн. Бо удаада Владимир Путинниң деңнелинге Красноярск крайны хөгжүдериниң талазы-биле чөвүлел хурал болуп эрткен. Демир- орук адырының бо төлевилелин Чөөн чүкте демир орук шугумунуң – БАМ-ның болгаш Транссибтиң чүъктешкизин чиигедир база чаа Төп-Евразий транспорт коридорун хевирлеп тургузары-биле чугаалажып турар. Төлевилелдиң боттанылгазы Барыын Кыдаттың экономика талазы-биле сайзыралдыг черлеринче эң дорт орук болур. Чаа демир-орук Сибирьниң регионнарының ажыл-чорудулгазын диргизиптер деп демдеглээн.
Төлевилелдиң боттанылгазын дүргедедири-биле бо уг-шигге чүък болгаш пассажирлер аргыжылгазының агымын тодаргайы-биле санап үндүрери чугула. Айтырыгны моол тала-биле ажылдап кылыры эргежок чугула. Маңаа хамаарыштыр чугааны Владислав Ховалыг Моолдуң экономика болгаш хөгжүлде сайыды Чимэдийн Хурэлбаатар-биле, демир- орук айтырыының талазы-биле Кыдаттың Россияда Онза болгаш Бүрүн эргелиг Элчини Чжан Ханьхуэй-биле шуулганның ажылының үезинде чугаалашкан.
Бир эвес Россия Кыдатче демир-орук шугумун ажыдар дизе, Тываны таварты орук бөгүн эң ажылдап кылдынган хевир болур. Бистен аңгыда, демир-оруктуң ажыттынарынга Хакасия, Красноярск край, Иркутск облазы сонуургалдыг. “Регионнар аразының “Сибирь дугуржулгазы” каттыжыышкынының транспорт талазы-биле Таарыштырыкчы чөвүлелин амгы үеде даргалап турар болганымда, ук төлевилелдиң сайгарылгазын чоокку үеде өске губернаторлар-биле кады чорударын планнап тур мен” – деп, Тываның Баштыңы медеглээн.
Шуулганның үезинде В. Ховалыг Газпромбанкының оралакчы даргазы Алексей Белоусов-биле дугуржулганы чарып, банкының салбырын республикага ажыдар аргазының дугайында чугааны чоруткан. Ындыг чүүл Тываның экономика адырынга чижилгени улгаттырар. Газпромбанк дээрге боттуң акша-хөреңгилериниң хемчээлиниң талазы-биле Россияда мурнакчы черни ээлеп турар. “Бо саң-хөө организациязы республиканың кызыгаар чоогу байдалын өөренип көөр деп турар. Бир эвес маңаа банкының салбыры ажыттына бээр чүве болза, Газпромбанк рубльди төгериктерге, а төгериктерни рубльге орнаарын хүлээнип ап турар. Моол-биле кады ажылдажып турар тус черниң саарлыкчылары ындыг ачы-дузаны чөптүү-биле үнелээри чугаажок” – деп, Тываның Баштыңы Владислав Ховалыг чугаалаан.
Бистиң корр.
"Шын" №70 2023 чылдың сентябрь 16