Даарта, октябрь 22-де, 11.00 шакта ТР-ниң Национал музейиниң конференц-залынга Күжүгет Шойгу аттыг культура фондузунуң «Тываның эм үнүштериниң дугайында тайылбыр дептер тургузары» деп төлевилелиниң таныштырылгазы болур.
Тайылбыр дептер ийи аңгы хевирде кылдынган: «Тываның черлик эм үнүштери» болгаш «Үнүштерден чыгган эмнер болгаш үнүш шайлары». Бо ховар төлевилелди Күжүгет Шойгу аттыг культура фондузу Тываның күрүне университединиң Биология болгаш экология кафедразының, Орус география ниитилелиниң киржилгези-биле боттандырган.
Тайылбыр дептер регионнуң эм үнүштериниң, ооң шынарларының болгаш ажыглалының дугайында үнелиг медээлерден тургустунган. Материалдар тускай эртемниглерге болгаш медицинаның чаңчылчаан хевиринде сонуургалдыг кижи бүрүзүнге ажыктыг. Төлевилелдиң таныштырылгазынга киришкен аалчылар үнелиг ажылды бир дугаарында көөр аас-кежиктиг болур.
