Тываның Чазаа тускай шериг операциязының киржикчилериниң дөргүл-төрелдеринге пособиелер болгаш өске-даа төлевирлер бээриниң чурумун бөдүүнчүткен. Республиканың Баштыңы Владислав Ховалыг октябрь 10-да чогуур доктаалга адын салган.
Бо үеге чедир ТШО киржикчилериниң өг-бүлелери регионалдыг деңнелге көрдүнген деткимче алырда, төлээ органынче — Тываның Күш-ажыл болгаш социал камгалал яамызы, ол ышкаш тус черлерде яамыга хамааржыр албан черлеринче төлевирлер бээриниң дугайында билдириишкиннерлиг баар ужурга таваржып турган. Оон аңгыда, Күш-ажыл яамызынче документилерни почта таварыштыр чагыглыг чагаа кылдыр чорудуп болур турган.
Ам чогуур хемчеглер талазы-биле билдириишкинни ведомстволуг албан черлеринче барбайн, онлайн чорудуп болур. Күрүне ачы-дуза порталынче киргеш, ТШО киржикчилеринге болгаш оларның өг-бүлелеринге тургускан тускай бөлүкте чогуур майык езугаар долдурар.
Чугаа Тываның бюджединден болгаш республиканың Чазааның курлавыр фондузундан хандырып турар регионалдыг төлевирлер дугайында чоруп турар. Шериг албанныгларның өг-бүлелери күрүне ачы-дуза порталы таварыштыр билдириишкиннерин киирип болур, ылаңгыя, бичии уруунга төлевир акшазы, коммунал ачы-дуза төлээри, чок болган кижизин орнукшудары, оларның чоок кижилеринге боттуг дуза дугайында билдириишкиннер.
Документиниң сөзүглелин www.pravo.gov.ruэрге-хоойлу порталында база Тыва Республиканың албан езузунуң сайтызында салган. Ону дилээри белен, «Тыва Республикада бичии уругга пособие бээриниң Чурумунга база Тыва Республиканың Чазааның 2024 чылдың март 4-те 78 дугаарлыг доктаалынга өскерилгелер киирериниң дугайында» деп доктаалдың адын «поисковикке» бижиир.
Бистиң корр.
«Шын» №79 2024 чылдың октябрь 16