Тываның Баштыңы Владислав Ховалыгның удуртулгазы-биле эрткен Аппарат хуралынга неделя дургузунда республика девискээринге болган онза болуушкуннарга хамаарыштыр оперативтиг албаннарның чыгган медээлерин түңнеп чугаалашкан.
ИХЯ-ның дыңнаткан медээзи-биле республика девискээринге эрткен неделя дургузунда 43 кем-херек үүлгедиишкини болган. Дөрт кибер кем-херек үүлгедиишкининиң түңнелинде хамаатыларга 3 сая ажыг рубль когаралды чедирген. Оон аңгыда 32 арага аймаа садар хоойлу хажыдыышкыны демдеглеттинген, 17 административтиг протоколду тургускан.
2024/2025 өөредилге чылының күрүне аттестациязының түңнелдериниң дугайында Тываның Өөредилге яамызының берген илеткелинден алырга, ниитизи-биле 7191 кижи күрүне аттестациязынга киришкен, оларның чаңгыс аай күрүне шылгалдазын 2795 кижи дужааган. Кол күрүне шылгалдазының түңнелдери-биле 9 класс дооскан дугайында аттестатты 7183 кижи азы ниити санның 99,3 хуузун алган. Чаңгыс аай күрүне шылгалдаларының түңнелдери математика биле информатика эртемнеринге уругларның билии бедип турарын көргүскен.
“Республикага кадрлар белеткели – чугула айтырыг. 9 класс доозукчуларының барык 61 хуузу школаларынга улаштыр өөренип арткан-даа болза, ортумак өөредилге черлеринче кирип турар уругларның саны чылдың-на 5 хуу өзүп турар. 9 класс доозукчулары колдуунда техниктиг эртемнер, көдээ ажыл-агый болгаш ачы-дуза чедирилге талазы-биле угланыышкыннарлыг ортумак өөредилге черлеринче кирип ап турар” – деп, Владислав Ховалыг демдеглээн.
Ол ышкаш республиканың эрге-чагыргазынга салым-чаяанныг уругларга боттарын улаштыр сайзырадырынга эптиг байдалдарны тургузары чугула деп Чазак Даргазы айыткан.
“Республиканы хөгжүдеринге тудуг талазы-биле, информастыг технологиялар, энергетика, даг тывыжы, орук-тудуг адыры болгаш туризм талазы-биле бедик мергежилдиг специалистер хереглеттинип турар” – деп, Владислав Ховалыг дыңнаткаш, республиканың экономиказының хереглелинге дүүштүр дээди болгаш ортумак өөредилге черлеринче кирериниң хыналда санын таарыштыр көрүп көөрүн Тываның Өөредилге яамызынга дааскан.
Бистиң корр.
Чуруктарны ТР-ниң Чазааның социал четкизинден алган.
“Шын” №42 2025 чылдың октябрь 30
