Тывада ТШО киржикчилерин деткииринче угланган “Тываның маадырлары” деп программага киржир күзелдиглерге чагыг киирер ажыл ам-даа уламчылавышаан. Амгы үеде кирген чагыглар саны 400 ашкан. Ук төлевилелге маадырларның сонуургалының улуун сан-чурагай херечилеп турар.
Ооң кордакчыларының бирээзинге ТШО киржикчизи, Чадаана хоорайның 1 дугаар школазының директорунуң чөвүлекчизи, хөй ажы-төлдүг ада Буян-Билэг Ооржак хамааржыр. Ол өөредилге адырында барык 13 чыл ажылдаан.
“Тываның Маадырлары” дээрге Президентиниң “Маадырлар үези” деп программазының бистиң регионда хевири болуп турар. Ол дугайында Тываның Баштыңы Владислав Ховалыг 2025 чылда Тываның Дээди Хуралынга болган бодунуң Айыткалынга дыңнаткан. Ооң киржикчилери Тываның күрүне университединге чыл дургузунда өөредилгени эртип, чаа арга-мергежилди шиңгээдип ап, билиин бедидип алыр аргалыг болур.
ТШО киржикчизи Сайгын Бюрбю ук төлевилелди эки деп үнелеп, бодунуң бодалын илереткен: “Бо программаны бүрүнү-биле деткип тур мен. Ол ТШО киржикчилериниң аразындан чазак-чагырга органнарынга кадрлар курлавыры тургузарынга кончуг чугула эгелээшкин-дир. Бодум аңаа киришпес мен. Чүге дээрге Тывага келир үеже чүткүлдүг, бүзүрелдиг аныяк удуртукчулар херек. Мээң дайынчы эш-өөрүм фронтуга боттарының ат-алдарын көргүзүп, бадыткап каан.
Олар тайбың амыдыралга база төлептиг кижилер болуп шыдаар дээрзинге бүзүрээр мен”.Ол ышкаш Россияның Маадыры Буян Куулар база төлевилелге киржири-биле чагыгны киирген. Төрээн чуртунга болгаш тыва чонунга ажыктыг кылдыр ажылдаар дээш, төлевилелде киржип турарын ол демдеглээн. Ооң чугаалап турары-биле алырга, Россияның Маадырының элээн хөй дайынчы эш-өөрү база аңаа киржир изиг күзелин илереткен.Ук төлевилелге киржири-биле апрель 9-ка чедир “Тываның маадырлары” сайтыже clck.ru/3JWRqf киргеш, чагыгны киирип, анкетаны долдуруп болур. Ында анкетаны канчаар долдурарын эгезинден төнчүзүнге чедир тодаргайы-биле көргүзүп, тайылбырлап каан.
Ч. СААЯ белеткээн.
Чурукту "Тыва24" телеканалдан алган.
«Шын» №12 2025 чылдың апрель 3