Россия Федерациязының Агаар-десант шерииниң хоочуннар ассоциациязы тускай шериг операциязының хоочуннарынга бирги чыышты Томск хоорайга эрттирген.
Аңаа бүгү Сибирьден, ооң иштинде Тывадан хоочуннар киришкен. Тывадан улуг лейтенант Мөңге Тагба эрес-дидим чоруу дээш база дайынчы даалгаларны чедиишкинниг күүсеткени дээш, «Төрээн чуртунга албан-хүлээлгези дээш» деп хөй-ниити медалы-биле шаңнаткан. Агаар-десант шерииниң хоочуннарының ассоциациязының күүсекчи директору Дмитрий Афанасьев аңаа шаңналды тывыскан.
Мөңге Тагба 55-ки гвардейжи мото-адыгжы (даг) бригадада шериг албанын эрттирип турар болгаш Тыва регионнуң хөй-ниити организациязының, Чөөн чүктүң шериг округунуң хоочуннар эвилелиниң удуртукчузу. Ол ышкаш «Тываның маадырлары» программа ёзугаар өөредилгезин уламчылап, республикада хоочуннар ниитилелиниң хөгжүлдезинге үлүг-хуузун киириштирип чоруур.
Хемчегниң үезинде хоочуннарга социал деткимче талазы-биле хоойлужудулгаларны экижидери-биле эгелээшкиннерни, хоочуннарның удуртукчу чоруун сайзырадыр талазы-биле мастер-класстарны организастаан. Оон ыңай тускай шериг операциязының хоочуннарын ажылга хаара тудар дугайында «төгерик столга» сайгарган.
«Биске тускай шериг операциязының киржикчилеринге бо хемчег амыдыралывыста таваржып турар чугула айтырыгларны шиитпирлээриниң аргазы болуп турар. ТШО-нуң хоочуннар эвилелин организастаары дайынчы бүрүзүнге комплекстиг деткимче көргүзериниң бир чаа угланыышкыны дээрзинге бүзүрээр мен»– деп, Мөңге Тагба чугаалаан.
Хемчегниң киржикчилери башкарыкчы чок ужар агаар системаларын ажылдап кылыр эртем-шинчилел болгаш бүдүрүлге төвүн база сонуургап четкеннер. Олар өөредилге дериг-херекселдерин ажыглап тургаш, дроннарны башкарарын шенеп көргеннер.
Бистиң корр.
Чурукту интернеттен хоолгалаан.
«Шын» №41 2025 чылдың октябрь 23