Тываның Улусчу фронтузунуң эксперттери Кызылдың президентиниң кадет училищезиниң кадеттеринге оңгу лааларын канчаар кылырын көргүскен. Кадеттер боттарының ээлчээнде лааларны кылгаш, тускай шериг операциязында дайынчыларже чорудар.
“Хүн дуртунуң кыскалааны-биле оңгулар иштинде чурттап турар дайынчыларга чырык кончуг чугула херек. Ынчангаш ээлчеглиг гуманитарлыг дузаны чыып тургаш, дайынчыларже чорудар чугула херек херекселдер даңзызынче оңгу иштинге ажыглаар кылымал лааларны база киирип алган бис. Кызылдың президентиниң кадет училищезиниң удуртулгазынче лаалар кылырынга дузалажыр дилегни киирген бис. Олар боттарының ээлчээнде бистиң дилээвисти хүлээп алгаш, дузалажып кирипкеннер” – деп, Улусчу фронтунуң регионалдыг салбырының удуртукчузу Саима Далчин тайылбырлаан.
Улусчу фронтунуң аныяктар төлевилелдериниң талазы-биле координатору Дмитрий Зырянов оңгу лааларын канчаар кылырын кадеттерге көргүспүшаан, тайылбырлап берген. Училищениң башкылары столоваяга чем кылган соонда, арткан кукуруза, чочак-тараа лаазаларын болгаш саазын хааржакчыгаштарны чыггаш, лаа кылыр тускай бүдүмелдерни садып алганнар. Лааза иштинче таарыштыр суккулаан хааржакчыгаштар лааның өзээн солуп турар. Ооң кырынче лаа кылыр бүдүмелди эргискеш, кудуп каарга, картонче ол сиңип киргеш, лааны кыпсырга, ышталбас болурун тайылбырлаан. Кадеттерге лааларны канчаар кылырга чогумчалыг, эптиг, шын болурунуң чажыттарын шуптузун Дмитрий Зырянов тус-тузунда айыткан.
“Мастер-класска рота бүрүзүнден кадеттер кээп киришкен. Олар боттарының ээлчээнде чоокку хүннерде боттарының чаңгыс классчы эш-өөрүнге база айтып, көргүзүп бээрлер. Лаа кылыр бүгү-ле херек чүүлдерни профэвилелдиң болгаш ада-иелерниң күзелдии-биле чыгган акша-хөреңгизи-биле саткан. Оңгу лааларын кылгаш, ТШО-да киржип турар дайынчыларже чорудуп бээри-биле Улусчу фронтуга дамчыдар бис” – деп, училищениң профэвилелиниң даргазы Сергей Чигжит дыңнаткан.
Кызылдың президентиниң кадет училищези келир үениң шериглерин белеткеп турар болганда, тускай шериг операциязының киржикчилеринге боттары аңгы волонтёржу шимчээшкинни тургузуп алганнар.
“Бир дугаарында Россияны камгалаар дээш, мурнуку одуругда чоруп турар боттарывыстың офицерлер апарган доозукчуларывыска дузалажып турар бис. Ол дээрге 1 дугаар ротаның доозукчулары-дыр. Олар шупту медальдар болгаш орденнер-биле шаңнатканнар. Ында оңгу четкилери кончуг хереглеттинип турарын билир бис. Ынчангаш бистиң кадеттеривис өөредилгеден дашкаар хостуг үезинде четкилерни база аргып турарлар. Ол ышкаш чугула херек эм-таң садарынга акша-хөреңгини база чыып турар бис. ТШО дайынчыларынга дуза чыыры дээрге-ле, патриотчу чоруктуң ёзулуг үлегер-чижээ болур болгаш бистиң Ада-чуртувустуң тиилелгезинге бүзүрел-дир. Ол дээрге биске кончуг улуг ужур-дузалыг шимчээшкин-дир” – деп, кадет училищениң Адалар чөвүлелиниң даргазы Артыш Оюн чугаалаан.
Улусчу фронтунуң чугаалап турары-биле алырга, кадеттерниң кылган оңгу лаалары амгы үеде чыып турар гуманитарлыг дуза-биле кады ТШО киржикчилеринче октябрь айның ортан үезинде чоруур.
Оон аңгыда, ТШО киржикчилерин деткиири-биле кадет училищеде “Солдатка чагаа”, “Оңгу четкилер”, “Кургаг душ” дээш оон-даа өске акцияларны чорудуп, училищениң бүгү-ле кадеттери, башкылары, ажылдакчылары, ада-иелери ук акцияларда идепкейлии-биле киржип турарлар. Ол ышкаш кызыгаар чоогунда чурттап турар өөреникчилерге өөредилге херекселдерин база чыып чорутканнар.
Чыжыргана СААЯ.
Буян Ооржактың тырттырган чуруктары.
“Шын” №76 2024 чылдың октябрь 5
