Найысылал Кызылга тускай шериг операциязының киржикчилеринге болгаш оларның өг-бүлелериниң кежигүннеринге ажылчын олуттар ярмарказы болуп эрткен.
Тускай шериг операциязындан чанып келген дайынчы кижи тайбың амыдыралга дүрген чаңчыгып, тааржыр ажылды канчаар тып ап болурул? Регионнуң Күш-ажыл болгаш социал политика яамызы биле «Ада-чурт камгалакчылары» күрүне фондузу мындыг сорулгалыг дугуржулганы кылгаш, ТШО киржикчилеринге болгаш оларның өг-бүле кежигүннеринге ажылчын олуттар ярмарказын эрттирген.
Дайынчы хөделиишкиннер хоочуннары албан-хүлээлгезинден халажып чанып келгеш, кайыын ажыл тып алырын, тайбың чуртталганы канчаар эгелээрин боданыр. Оларга дузалажыр дээш, ажылчын олуттар ярмаркаларын организастап турар. Ындыг ярмаркалардан бодунга тааржыр ажылды тып ап, чаа мергежилдерге өөредилгени эртип, улаштыр профессионал сайзыралды болгаш боттарынга, өг-бүлезинге акша-хөреңги талазы-биле турум чорукту чедип алыр арганы ап болур.
"Кандыг ажылдар барын сонуургап келдим. Бир ажыл көрүп алдым. Мөңгүн-Тайгада, бодум кожуунумда, чогум ажылдап турар мен. Амдыызында көрүп турарым ол" — деп, ТШО киржикчизи Денис Пегов чугаалаан.
Ийи талага ажыктыг мындыг хевирлиг хемчеглер улуг ужур-дузалыг. Тускай шериг операциязындан халашкан кижилерге чаа ажыл-ишке бодун шенээр арга, а ажыл берикчилеринге харыысалгалыг, чурумнуг, чүткүлдүг ажылдакчыларны тып алыр арга.
“Хүн дургузунда 30 хире кижи биске келди. Коллегаларым-биле кады оларга консультацияларны, сүмелерни кылдывыс. Росгвардия албанының ОМОН-га база ведомстволардан дашкаар камгалал черинге 15 кижини шилип алдывыс. Оларга хүлээп алыышкын (собеседование) эртерин база күш-шыдалының белеткелин хынадырын сүмеледивис” — деп, Албан черинден дашкаар камгалалдың кадрлар салбырының начальниги Роксана Монгуш дыңнаткан.
Ада-чурт камгалакчыларынга ажылчын олуттар ярмаркаларын эрттирип тура- ры — оларның төрээн чуртунга бараан болган албан-херээ эскертинмейн артып калбайн турарын бадыткап турар. Олар күрүнениң болгаш ниитилелдиң деткимчезин база дузазын алырынга бүзүрелдиг болур ужурлуг.
«Центр-А» хууда камгалал албан чериниң чиңгине директору Орлан Сарыгбай хүлээп алыышкын кандыг эртип турарын тайылбырлаан: «Бис 6 биле 4 дугаар разрядтың камгалакчыларынга ажылчын олуттарны хандырып турар бис. Ярмаркаже бисти тускай чалаан. Амдыызында 17 кижи биске келди, оларның тозу резюмезин киирген. Оларның 7-зи бистиң ажылывыска тааржыр-дыр. 6 биле 4 дугаар разрядтың камгалакчызы кылдыр ажылдаар дизе, баштай эмчи шинчилгезин эртер, ооң соонда камгалакчы кылдыр тускай өөредилге черлеринге өөредилгени эртер ужурлуг. Чүгле ынчан Россия гвардиязындан херечилелди алыр”.
Чаңгыс шөлде 22 ажыл берикчизи 350 хире ажылды саналдаан. Бүдүн республикада хостуг ажылчын олуттарның саны 1200 ашкан.
“Бөгүн мында Тываның эң-не улуг ажыл берикчилери келген. Ол дээрге даг-тывыш бүдүрүлгелери-дир: Эльбрусметалл-Литий, Лунсин, Тарданголд дээш өске-даа. Олардан өске өөредилге, кадык камгалалы, тудуг адырларындан ажыл берикчилери база ажылдарын таныштырган. Ол ышкаш Чонну ажылга хаара тудар төптерниң партнёрлары Адвокаттар палатазы, Россияның Социал фондузу, МФЦ консультацияларны чорудуп турар” — деп, Тываның Чонну ажылга хаара тудар төвүнүң директорунуң оралакчызы Нам Дунзунмаа чугаалаан.
Ярмаркага киржип шыдаваан тускай шериг операциязының киржикчилери таарымчалыг кайы-даа үеде “Работа России” чонну ажылга хаара тудар төптүң тус черлерде салбырларынче баргаш, арга-сүмени ап, тааржыр хостуг ажылчын олутту тып ап болур.
ТР-ниң Чонну ажылга хаара тудар төвүнүң тырттырган чуруктары.
«Шын» №41 2025 чылдың октябрь 23
