«Ада-чурт камгалакчылары» фондунуң организастааны ТШО хоочуннарының Бүгү-российжи 2-ги шуулганын «Патриот» делгелге төвүнде эрттирип турар.
Тывадан тускай шериг операциязынга амы-тынындан чарылган дайынчының өг-бүлезиниң кежигүнү Оюмаа Банчык болгаш дайынчылар Эртине Ооржак, Күдер Севек, Мөңге Тагба, Владимир Ооржак киржип турар.
Тываның төлээлери РФ-тиң Маадыры, «Ада-чурт камгалакчылары» фондунуң даргазының оралакчызы Алексей Романов база төөгүчү Александр Звягинцев-биле таныжып, найыралдажып алган. «Патриот» шериг-патриотчу паркка база экскурсиялааннар.
Дайынчы хөделиишкиннерниң хоочуну Владимир Ооржактың чугаалааны-биле алырга, шуулганның программазы аңгы-аңгы угланыышкыннарлыг болгаш, кижиниң билип алыры ажыктыг чүүлдер хөй болган.
Шуулганны 2024 чылдың январь 17-ге чедир болур дээрзин сагындыраал. ТШО маадырлары келир үениң салгалының патриотчу кижизидилгезинге кол рольду ойнаар дугайында чугаалажыышкыннар, ТШО киржикчилериниң комплекстиг реабилитациязынга хамаарышкан "төгерик стол", тускай специалистерниң консультациялары программада көрдүнген. ТШО киржикчилеринге өөредиглиг программалар, мастер-класстар болгаш шериг корреспондентилер-биле канчаар чугаалажырын тайылбырлаар өөредиглер база болур.
«Ада-чурт камгалакчылары» фондунуң Тывада салбырының медээлеринден алган.
Чурукту интернет четкизинден алган.
“Шын” №3 2024 чылдың январь 17
