Дайынчы хөделиишкиннерге киришкен соонда, кемдээшкин албаан-даа болза, дөмей-ле кижи бүрүзүнүң кадыкшылында кандыг-ла-бир өскерлиишкиннер турар. Ынчангаш чанып келгеш-ле, бодунуң кадыкшылының байдалын тодарадып, эмчи шинчилгезин эртип алыры чугула.
ТШО киржикчилери республиканың кайы-даа поликлиниказынга чаңгыс хүн дургузунда диспансеризацияны оочур-даа, төлевир-даа чокка эртип алыр аргалыг. Чижээлээрге, Республиканың 1 дугаар эмнелгезиниң Консультация-диагностиктиг поликлиниказынга ТШО киржикчизи дараазында чурум ёзугаар эмчи шинчилгезин эртип ап болур:
Эгезинде улус бүрүткээр черде ТШО киржикчилеринге көрдүнген соңгажыгашка азы бүрүткел чериниң ниити чон хүлээр черинге оочур чокка чеде бээр. Ооң соонда 408 дугаар кабинетче оочурдан дашкаар кире бээр. Бир эвес ТШО киржикчизиниң кылаштаары багай болза, бирги каътта 103 дугаар кабинетке баар. Аңаа баргаш, болгу дег аарыгларны тодарадыр анкетаны долдурар, узунун, деңзизин, долгандырыын хемчээр, ниити хан анализин дужаар, ЭКГ-ни эртер. Ооң соонда флюорографияны эрткеш, терапевт эмчиниң консультациязын алыр.
Эмчи шинчилгезиниң түңнелдери дараазында хүн белен болур. ТШО хоочунунуң аарыгларын тодараткаш, улам хандыр шинчилге эртери-биле тускай эртемниг специалистерже чорудуптар.
ТШО хоочуннары диспансеризацияны кайы-даа поликлиникага эртенгиниң 8.00 шактан кежээкиниң 20.00 шакка чедир эртип ап болур. Паспортун, ЫМК (ОМС) полизин, дайынчы хөделиишкиннер хоочунунуң шынзылгазын азы ТШО-га киришкен дугайында справказын бодунга ап алыр.
ТШО хоочуннарының диспансеризация эртеринге Тывада “Ада-чурттуң камгалакчылары” күрүне фондузу дузалажып, кады ажылдап турар.
Чурукту болгаш медээни “Ада-чурттуң камгалакчылары” күрүне фондузундан алган.
«Шын» №39 2025 чылдың октябрь 9
