«Чурттаарынга таарымчалыг хоорай хүрээлеңин хевирлээри» федералдыг программаның онлайн бадылаашкынының доостурунга чедир дөрт хонук арткан. Бо хүнге чедир ниитизи-биле 74 259 кижи үнүн берген.
Чурттап турар азы төрээн чериниң хөгжүлдези дээш, 14 хардан өрү назылыг хамааты бүрүзү чылда чаңгыс катап үнүн берип, бадылаашкынга киржип болур эргелиг. Кожуун бүрүзүнде онлайн бадылаашкын кидин түлүк чоруп турар. Чамдык кожууннарның чурттакчылары төрээн чериниң сайзыралы дээш, аажок идепкейлиг бадылап, үнүн берип турар. Оларның бирээзинге Өвүр кожуун хамааржыр.
Өвүр кожуундан ийи төлевилел онлайн бадылаашкында киржип турар. Бирээзи кожууннуң төвү Хандагайтының төп кудумчузун сегередири. Кожуун чагыргазы-биле культура одааның аразынга «Ынак мен, Өвүр» деп бижиктиг стелла болгаш ук девискээрге узун сандайлар, сайгылгааннар, бок октаар савалар болгаш фонтан кылыры планда көрдүнген. Бо төлевилел дээш Өвүр кожууннуң 1267 чурттакчызы үнүн берген.
Өвүрнүң ийи дугаар төлевилели – кожуунга спорту сайзырадыр сорулга-биле Хандагайты биле Солчур суурнуң аразында 2 километр черге чадаг-терге оруун асфальтылаары. Чылыг үелерде кожууннуң аныяк-өскени суурлар аразынга аай-дедир чадаг-тергелиг чоруп болур апаар. Бо төлевилел дээш амдыызында 1208 кижи бадылаан.
2023 чылдың бадылаашкынынга эң-не хөй үннү алган төлевилел келир 2024 чылда «Чурттаарынга таарымчалыг хоорай хүрээлеңин хевирлээри» федералдыг төлевилелдиң дектимчези-биле боттаныр аргалыг.
Төрээн кожуун, суурунуң чаагайжыдылгазы дээш бадылаашкынга Барыын-Хемчик, Чөөн-Хемчик, Тожу, Бии-Хем, Каа-Хем кожууннуң чурттакчылары эң-не идепкейлиг киржип турар. Идепкей чок, эвээш бадылаан чурттакчылыг хоорай, суурларга Кызыл, Эрзин, Таңды кожууннар болгаш Кызыл хоорай хамааржыр.
Айдың ОНДАР.
Чурукту интернет четкизинден алган.
"Шын" №38 2023 чылдың май 27
