Республиканың кожууннарында «Чурттаар оран-сава болгаш хоорай хүрээлеңи» национал төлевилелдиң «Таарымчалыг хоорай хүрээлеңин хевирлээри» программазы-биле хөй-ниити девискээрлеринде чаагайжыдылга ажылдары доозулгалак. Бо дээрге эрткен чылын чоннуң бадылаашкынында тиилээн 30 төлевилел дээрзин сагындыраал. Тываның Тудуг яамызының дыңнатканы-биле алырга, чаагайжыдар объектилерниң ниити белени 93 хуу хире.
22 участокта ажылдар доозулган. Ак-Довуракта Алдар аллеязы, Бай-Тайга кожуунда хөккей шөлү, Каа-Хем кожуунда Мандала сесерлии, Барыын-Хемчик кожууннуң Барлык, Шекпээр, Аксы-Барлык суурларында дыштанылга черлерин туткан. Ийме суурда уругларга булуңнуг спорт шөлү, а Сукпак, Кара-Хаак, Сарыг-Сеп суурларда аныяктар сесерликтери белен болган.
Алды объектиде ажылдар адакталган. Тожу кожууннуң Ий суурда «Ом мани» парыгы 55 хуу белен. Кызылдың 12 дугаар школа девискээринде “Алдар аллеязы” объектиде ажылдар амдыызында оожум чоруп турар. Объектини бо чылдың ноябрьга чедир тудуп доозар ужурлуг.
6 чылдың дургузунда республика «Таарымчалыг хоорай хүрээлеңин хевирлээри» төлевилел-биле 750 ажыг сая рубльди хаара туткан. Хоорайлар болгаш суурларда бажың чанының болгаш хөй-ниитиниң 145 шөлдерин чаагайжыдып кылган.
Бистиң корр.
Чурукту интернет четкизинден хоолгалаан.
“Шын” №74 2024 чылдың сентябрь 28
