Ноябрь 14-те Тыва үндезин культура төвүнге Улусчу фронтунуң чылдың-на болуп эртер регионалдыг конференциязы болуп эрткен. Хемчег үезинде Тываның чурттакчыларының амыдыралының шынарын экижидеринче угланган хөй-ниитиниң саналдарының төлевилелин бадылаан.
Төлевилелди Тываның Баштыңы Владислав Ховалыгга дамчыдып бээр. Ук конференцияга кызыгаарланып, регионалдыг штабтың кежигүннериниң солчуушкуну база болган. Штабче идепкейжилер, “Шуптузун тиилелгеже!” төлевилелдиң төлээлери, Тываның күрүне университединиң ректору, аныяктар болгаш хууда сайгарлыкчылар кирген. “Шуптузун тиилелгеже” төлевилелдиң төлээлериниң аразында тускай шериг операциязының хоочуннары база бар. Конференцияның киржикчилери чоннуң сонуургалдарын бүрүнү-биле өөренип көөр амыдыралдың янзы-бүрү адырларын таныштырып көргүскен.
Конференцияга ниитизи-биле 55 төлээ болгаш волонтёрлар, төлевилелдиң идепкейжилери, шаңнал алган кижилер, Улусчу фронт-биле идепкейлиг кады ажылдап турар чазак-чагырга органнарының төлээлери дээш оон-даа өске чалаткан аалчылар келген.
Тыва Республиканың Дээди Хуралының (парламент) депутады Буян Донгак ол хүн регионалдыг штабче кежигүн кылдыр кирип, конференцияның база бир киржикчизи болган. Ол дайынчыларга гуманитарлыг дуза чыылдазын организастаар болгаш ону хуваар, үлээр талазы-биле ажылды ол харыылаары-биле хүлээнип алган. Чүге дээрге Буян Донгактың Россияның шериинге 2 чыл дургузунда албан-хүлээлгезин күүседип тургаш, ол талазы-биле алган арга-дуржулгазы улуг.
“Улусчу фронтунуң кежигүнү болурун шиитпирлеп алган чылдагааным болза, бистиң кол командылакчывыс, чурттуң Президентизи Улусчу фронтунуң бүгү-российжи штавын удуртуп турар. Оон аңгыда, мен шериг албанныг кижи болгаш, штабтың ёзулуг төлээзи болуп, берге үеде чуртумга дузалажып, бо угланыышкынга бодумнуң үлүг-хуумну киирер ужурлуг мен” – деп, Буян Донгак демдеглээн.
Конференцияның төнчүзүнде Россия Федерациязының Президентизиниң даалгазы-биле Улусчу фронтунуң тургусканы “Шуптузун тиилелгеже!” деп хөрек демдектерин байырлыг байдалга тывыскан. Бо чылын дайынчыларга болгаш чурттуң чаа девискээрлеринде тайбың чурттакчы чонга дуза чедирген кижилерге шаңналдарны тывыскан.
Ч. КАРА-САЛ.
Буян Ооржактың тырттырган чуруктары.
“Шын” №88 2024 чылдың ноябрь 16
Ч. КАРА-САЛ.
Буян Ооржактың тырттырган чуруктары.
“Шын” №88 2024 чылдың ноябрь 16
