Тамада дугайында бодал

Хоочун, улустуң башкызы Валентина Монгуштуң февраль 6-да үнген «Шын» солунда «Тамадалар деп кымнарыл ол?» деп материалын аажок чөпсүнүп, чүүлдүгзүнүп номчудум. Валентина Бегзиевна башкы кончуг-ла өөредиглиг, эки бижээн-дир деп билдим.

Мен хоочун культура ажылдакчызы кижи болгаш, чонумга бараалгап, кандыг-даа байырлалдарны эрттирип чордум. Ынчан ол үеде байырлалдар эрттирер кижилерни «тамада-даа» дивес, «ведущий» азы «башкарыкчы-ла» дээр чүве болгай.

Даа кожууннуң 230 чыл оюнда Культура бажыңынга улуг хуралды Аркадий Александрович Начын эмчи-биле кады башкарып эрттирдивис.

Байырлал эрттирерде, бир дугаарында, сценарийни кижи бижип алыр боор чүве. Кижиниң чонунга сөглээр сөзү безин бодамчалыг, эпчок чүве-даа чугаалаптар ыйнаан деп кичээнип олурар боор чүве. Чөөн-Хемчик кожууннуң чонунга бараан болуп чорааным-на шын. Билир кижилер ам-даа утпаан-на боор. Бир-ле катап, военкоматтың юбилейин культура одаанга башкарып эрттиргеш, «Северянкага» шайлап олурувуста, ынчан райпо даргазы Петр Хунаевич Монгуш менден мындыг айтырыг салды: «Силер бо юбилей, байырлалдар эрттиргеш, каш акша ап турар силер?» — деп. «Чок, мен акша-даа албайн турар мен, акша база алыр ужурлуг чүве бе, Петр Хуна- евич?» — деп, бодундан удур айтырарымга, харыы-даа бербейн, чүгле бажын чайып каар кижи болду.

Башкарыкчылап чорааш, бир мындыг солун, ховар таварылгага база таварышкан мен. Чыраа-Бажының суму чагыргазының даргазы Оолак Даржааевич Кара-Сал дүжүлгезинден чаа соңгуттуруп алган бодунуң оглу Никита Оолакович Кара-Салга чайлап берип, сумунун таңмазын клубтуң сцена кырынга-ла хүлээдип берди. Чадаана хоорай чагыргазынга херээжен дарга Ольга Доржуевна Салчак соңгуттуруп алырга, инаугурациязын база эрттирдим. Оон-даа өске солун таварылгалар дыка хөй.

Чүвениң шыны херек, бо амгы шагның тамадалары чоп-ла кончуг акша дээш кызар чүвел аан. Хөөкүй-ле чонун арай бодай аарак турза эки боор. Байырлалдар эрттиргеш, алган акша-биле кым-даа байываан чүве-дир. Ынчангаш акша-көпеек-даа ындыг-ла ыйнаан, шынап-ла, тамадаларны шилип, өөредиглиг семинарлардан эрттирип, бижип алган сценарийи бар деп чүвени хынап, көрүп, чөпшээрел бээр-бербезин тускай оргкомитет шиитпирлээр болза, чогумчалыг-даа ышкаш. Харын-даа сертификаттыг болурун чедип алза эки боор.

Виктория ПЮРЮНА, ТР-ниң культуразының алдарлыг ажылдакчызы.
Чурукту интернет четкизинден хоолгалаан.
“Шын” №7 2025 чылдың февраль 27