«Таврида.АРТ» — культура болгаш уран чүүл талазы-биле чогаадыкчы аныяктарныӊ платформазы.
Регионнарда «Таврида.АРТ» талазы-биле ажыл-ишти уштап-башкарып турар командаларныӊ түӊнел ужуражылгазы декабрь 18-20 хүннеринде Подмосковьеге болуп турган. Россияныӊ аӊгы-аңгы булуӊнарындан 150 кижи келген. 2024 чылда кылган ажылын түӊнеп, чаа 2025 чылдыӊ планнарын чугаалашкан.
Бодунуӊ чурттап турар регионунда аныяктарны эвилелдеп, Тавриданыӊ программазында хемчеглерни башкарып эрттирер кижини амбассадор дээр. Тыва Республикада Тавириданыӊ баштайгы төлээзи, амбассадору – Наталья Донгур.
Бүгү чурттуӊ 145 амбассадорунуӊ аразындан Наталья Донгур «ТОП-7» деп эӊ-не тергииннерниӊ санынче кирген. Төлептиг чедиишкиннери дээш «Таврида.АРТ» организацияныӊ чиӊгине директору аӊаа өөрүп четтиришкинниӊ бижиин тывыскан. «Аян чоруктан дээре» деп программа-биле Россияныӊ кайы-даа талазынче чоруп болур шаӊналды алган.
Наталья Донгур идепкейлиг өөрү-биле кады келир чылын амбассадорларны, медиа-амбассадорларны шилиир төлевилелдиӊ видеозун тырттырарынга база киришкен. «Бүдүн хүн дургузунда тырттырып турдувус. Удавас команданыӊ чаа киржикчилерин шилиир медээ чарлалдарындан көөр бис. Аӊаа силер база киржип болур силер. Чагыг кииргеш, кады чугаалажыр апаар» — деп, ол чугаалаан.
Бо төлевилелге киржири халас боор. Чурттаар болгаш чемненир, Москва-Крым баар орук чарыгдалын организация төлээр.
Тавриданыӊ программаларыныӊ дугайында медээни https://tavrida.art/, «Таврида.Арт Тыва» телеграм-каналдан t.me/tavridatyva сайтыдан: көрүп ап болур.
ТМГ-ниң медээлеринден Р.ДЕМЧИК очулдурган.
