Барыын-Хемчик кожуунда Ак-Хемниң эриинде кайгамчык чараш черде турар уругларның «Таёжный» лагеринге «Биргилерниң шимчээшкини» деп профильдиг сменаның байырлыг ажыдыышкыны болган. Аңаа бүгү Тывадан эң-не идепкейлиг, хөй-ниитижи уруглар келген.
Байырлыг хемчегге уруглар боттарын болгаш дагдыныкчыларын таныштырар хөглүг көргүзүглерни белеткеп алган. Лагерьниң ногаан театрынга болган байырлыг ажыдыышкынга Ак-Довурак хоорайның чагыргазының, «Биргилерниң шимчээшкини» тус чер салбырының төлээлери база келген. Олар оолдар болгаш уругларга кадык, ажыктыг база солун дыштанылганы, чаа эш-өөрнү тып алырын, а башкыларга — кижизидикчилер, инструкторлар, организакчылар болгаш вожатыйларга чайгы дыштанылга үезинде чедиишкинниг ажылдаарын күзээннер.
«Таёжный» сменазы июль 13-ке чедир уламчылаар. А келир чайын лагерьниң столоваязын бүрүнү-биле чаартыр, чаа техника болгаш мебель-биле дериир. Ол ышкаш эмчи блогунга капиталдыг септелгени чорудар. Ук лагерь «Тус черлерниң уруглар дыштанылгазының чаартылгазы» деп федералдыг программаже киргенин сагындыраал.
ТР-ниң Өөредилге яамызының медээзинден
“Шын” №48 2024 чылдың июнь 29
