«Театр» деп сөстү дыңнаптарга-ла, хөй сайгылгааннарлыг, чараш люстраларлыг чырык өргээ, улуг көжегелерлиг сцена, каас-чараш кеттинген кижилер — бир-ле онзагай байырланчыг байдал кижиниң сагыжынга кирип кээр. Театрже чедери дээрге-ле бичии байырлал-дыр. А ол чараш байырланчыг байдалды үревес дизе, берге эвес чамдык дүрүмнерни сагыыры күзенчиг.
1. Театрже баарда, эр кижи смокинг, кыс кижи кежээки платье кедери албан эвес. Ынчалза-даа арыг-силиг, каас азы классиктиг хеп кедери таарымчалыг. Кандыг-даа байырлалче кроссовка идиктиг, джинсы чүвүрлүг барбас болгай бис. Ол ышкаш шылырааш пакеттер азы улуг рюкзак чүктеп болбас, силерни ынаар киирбес-даа.
2. Театрже 20–30 минута бурунгаар келир. Ол үе даштыкы хевин гардеробка дужаагаш, эттинип алгаш, олудун ээлеп алырынга чедер. Бир эвес озалдаан болза, олудун дилеп, олурар кижилер аразынче тырлып кирбейн, оожум эрткеш, бир хостуг олутту ээлеп алыр. Оон антракт үезинде бодунуң олудунга олуруп алыр. Рядтың ортузунче эртер таварылгада, олурар кижиже арны-биле көрнүп алгаш, оожум буруузун миннип тургаш эртер.
3. Зал иштинге таныыр кижизин көрүп кагза, холун чайып, каш ряд ажылдыр алгырып чугаалажып болбас. Хүлүмзүргеш, азы бажын согаш кылып каарга, чедер.
4. Олуттуң хол салыр черин иелдирзин эжелевес, чаныңарда олурар көрүкчү база хол салыр эргелиг болгай. Ол ышкаш чанында эжи-биле чыпшындыр, эгиннерин үскүлештирип алгаш олурбас, артында көрүкчүге сценада чүү болуп турары көзүлбейн баар.
5. Театрже аъш-чем албас. Шии, концерт үезинде чем чиксей берзиңерзе, театрда буфет бар. Аңаа 3-кү коңга эдеринге чедир турары база албан эвес.
6. Шии үезинде – шимээн үндүрбези кол дүрүм. Телефоннарны өжүрерин азы үнүн бичииледип алырын билир бис, ол чүгле көрүкчүлерни эвес, артистерниң кичээнгейин чардыктырар. Аарып турар болза, театр барган херээ чок — чөдүрген, аспырган кижи дыңнаары кымга-даа күзенчиг эвес болгай.
7. Көрүлде үезинде тургаш үнүп болбас, ол кижиниң культура чогун көргүзүп турар. Үнүксээр болза, антракт, чапсар үезинде чоруй барып болур.
8. Концерт төндү-төнмеди бе азы көжеге дугланыры-биле гардеробче маңнаан херээ чок. Артистер көрүлде төнерге, адыш часкаашкыннарынга мөгейип үнер чаңчылдыг. Өөрүп четтириишкинниң адыш часкаашкыннарын бээри кымга-даа артык эвес.
9. Шии азы концерт үезинде артистерге боодал чечек сөңнээри чараш чаңчыл. Ынчалза-даа сцена кырынче үнгеш, чечек тутсуру шын эвес. Сцена – артист кижиң ажылдаар шөлү-дүр, ынаар көрүкчү кижи үнүп болбас. Чечектерни шии төнерге, сцена мурнунче баргаш, артиске тутсур азы театр ажылдакчызынга дамчыдары-биле берип каар.
Театрга бот-боттарывыска эвилең-ээлдек, хүндүткелдиг болур болзувусса, көрген чараш чүүлүвүс сагыш-сеткиливиске уттундурбас байырлал бооп артар.
Алдынай СОЯН белеткээн.
Чуруктарны интернеттен хоолгалаан.
“Шын” №5 2025 чылдың февраль 13
