Тыва Республиканың Алдан-Маадыр аттыг Национал музейи школа музейлериниң аразынга мөөрейни чарлаан. Аңаа ниитизи-биле 20 команда киришкен. Мөөрейниң киржикчилери «Школа музейинге кичээлдер», «Мээң школамның музейинге», «Тергиин школа музейи» деп номинациялар дээш турушкан.
Бай-Хаак ортумак школазының башкызы Валентина Боровикованың «Бистиң чаңгыс чер чурттугларывыс – Ада-чурттуң камгалакчылары. Фронтудан чагаалар» деп музейге кичээлин жюри кежигүннери бедик үнелээн. Ольга Доспанның «Тываның улустуң чогаалчызы С.А. Сарыг-оолдуң чогаалдарынга музей экспонаттарын ажыглаары» деп интеллектуалдыг кичээл-оюннуг видео-таныштырылгазын онзалап демдеглээн. Ол ышкаш Анжела Нурзет, Ирина Байыр, Алдын-кыс Ооржак болгаш өскелерниң-даа ажылдары жюри кежигүннерин сонуургаткан.
«Мээң школамның музейинде онзагай экспонат» номинацияга республиканың 12 кожуунундан 17 аныяк чурт шинчилекчилери киришкен. Өөреникчилер школазында онзагай экспонат дугайында кыска чогаадыгларын таныштырган.
Өвүр кожууннуң Чаа-Суур ортумак школазының 5-ки классчызы Бунзай Тюлюш солун экспонатты таныштырган. Чуга демирден хол-биле кылган ойнаар машинаны көргүскеш, ойнаарак, шынап-ла, ховар, эрги шагның эди деп, ол шынзыдып шыдаан.
Бии-Хем кожууннуң Сесерлиг сумузундан 6-гы классчы Асель Удумбара «Чайка» марканың хол шагының дугайында таныштырган. Ол шак Наталья Дойдаловна Ажыкмаа-Рушевадан дамчып келген. Ол шакты уруунга Март 8 байырлалын таварыштыр белекке бээр ужурлуг турган, ынчалза-даа Надя март 6-да чок болган. Амгы үеде хол шагы Бии-Хем кожууннуң Сесерлиг сумузунда Н.Д. Ажыкмаа аттыг школа музейинде шыгжаттынган.
Эрзинниң Мөренден Сонам-Байыр Мелдээнниң, Өвүрнүң Солчурдан Милена Ондарның, Дус-Дагдан Айыраң Кууларның, Бай-Хаактан Чимит Монгуштуң, Эрзин школазындан Мила Соянның болгаш өскелерниң-даа экспонаттары онзагай болган. Жюри кежигүннеринге ук номинацияның тиилекчизин илередири берге болган. Ынчалза-даа үннерни санаан түңнелинде, Эрзин кожууннуң Мөрен ортумак школазының өөреникчизи Сонам-Байыр Мелдээн тергиидээн.
«Тергиин школа музейи» номинацияга 19 кижи киришкен. Ооң тиилекчизи Таңды кожууннуң Бай-Хаак ортумак школазының музейи болган.
ТР-ниң Өөредилге яамызының медээлеринден.
Чурукту интернет четкизинден алган.
«Шын» №38 2024 чылдың май 25