«Наадым–2024» малчыннар байырлалының чемпионнарының бирээзи – Тес-Хем кожуундан сарлыкчы Омак Ак-оол.
Тес-Хемниң төвү Самагалдай сумузундан Омак биле Чойгана Ак-оолдар «Кыштаг» төлевилелиниң 2019 чылдың киржикчилери. Аныяк малчыннар аалында шээр, бода, чылгы малдан аңгыда, кожуунда ховар мал – сарлыкты база тудуп турар.
Мөңгүн-Тайга кожуундан Тес-Хемче келиннеп келген Чойгана төрээн кожуунунуң чоргааралы болур – 20 хире сарлык малды база көжүрүп эккелген. Оон бээр ховар малдың саны каш катап өскен.
Аныяк малчыннар үш ажы-төлдүг. Өөнүң ишти Мөңгүн-Тайганың Мугур-Аксындан. Ол уран чүүл школазында домра башкызы. Чойгана уруглары-биле дыштаныр хүннерде ачазынга дузалажып кээрлер. Хеймер оглу ачазының солуттунмас дузалакчызы апарган. Ак-оолдарның кайызы-даа салгал дамчаан малчыннар.
Мал оолдаашкынының түңнелдери-биле малдың баш санын камгалап ап, ол ышкаш сөөлгү ийи чылдың дургузунда үндүрүглерин болгаш камгаладылга чыылдаларын өй-шаанда төлеп ап турган «Кыштаг» төлевилелиниң киржикчилерин Тываның Көдээ ажыл-агый болгаш аъш-чем яамызы хүн херели-биле ажылдаар станцияларны дамчыдып турар. 2021 чылда Тес-Хем кожууннуң шылгараан кыштагжыларының санынче Ак-оолдар база кирген.
Омак Ак-оол мооң мурнунда «Чеди чүзүн малымайны» деп көдээ ажыл-агый малының көргүзүглүг делгелгезинге «Кара-Карак» деп шолалыг сарлыын киириштирип турган.
Ш. ХОВАЛЫГ.
Чурукту маадырларның хууда архивинден алган.
"Шын" №54 2024 чылдың июль 20
![](https://shyn.ru/media/cache/2024/07/21/buqzsnnfmbkqltb3ljkda3ssujyabiumfevtkp3l6kaimrgd0-efazokfh44mdl-s9oxtqqldk0mevs5yy-3b-88-4019447585.jpg)