Республиканың 1 дугаар эмнелгезиниң невролог эмчизи Аржаана Донгак делегей чергелиг Бүгү-россияның III нейроконгрезин ёзугаар чылдың-на Москва хоорайда эртип турар аныяк эртем ажылдакчыларының мөөрейинге ийиги черни алган.
Бо болуушкун аныяк эмчиниң чүгле хууда чедиишкиннерин демдеглээни эвес, а тыва специалистерниң профессионал белеткелиниң бедик деңнелиниң бадыткалы-дыр. Тываның невролог эмчилери шак бо мөөрейге бир дугаар эвес, ооң мурнунда база киржип, шаңналдыг черлерни ап турган. Ажыы-биле чугаалаар болза, Россия чергелиг мөөрейге тиилекчилер аразындан үнмейн турар деп болур. Ооң бадыткалы– эрткен чылгы мөөрейниң түңнелдери. Ынчан Тываның база бир невролог эмчизи Айдыс Кыргыс үшкү черни чаалап алган.
Аныяк специалистерниң дагдыныкчызы болгаш эртем талазы-биле удуртукчузу Херелмаа Моңгуш. Ол Тыва Республиканың Эмчи-социал айтырыглар болгаш менеджмент талазы-биле эртем-шинчилел институдунуң директору, медицина эртемнериниң доктору, Россия Федерациязының күрүне шаңналының «Дагдыныкчылааны дээш» деп хүндүлел демдээниң эдилекчизи. Херелмаа Моңгуштуң чогумчалыг удуртулгазы база кол черни ээлеп турар дээрзин демдеглээри чугула.
Бистиң корр.
Чурукту Кадык камгалал яамызының социал четкизинден алган.
«Шын» №41 2025 чылдың октябрь 23
